Ne’e duni, Prezidente Repúblika, Francisco Guterres ‘Lú-Olo’ husu ba povu Timor Leste tomak labele haluha atu fó ninia direitu votu iha loron eleisaun.
Ema hotu-hotu nia votu importante tebes ba tinan lima oin mai. Ho votu povu nian mak bele habelar demokrasia liután no bele hala’o dezenvolvimentu tuir programa ne'ebé partidu polítiku ne'ebé sei manan iha eleisaun jerál ne’e.
Xefe Estadu husu ba lider partidu polítiku, militante no simpatizante sira atu fó liman ba malu hodi hametin pás no estabilidade iha Timor-Leste ne'ebé sei furak liután no bele hetan fiar husi rai seluk.
Lú-Olo fiar metin katak timoroan hotu sei tulun malu, serbisu hamutuk ho vontade tomak atu hala’o dezenvolvimentu intergradu no sustentavel iha Timor-Leste no ba jerasaun tuir mai.
Kona-ba debate públiku husi lider partidu polítiku ne'ebé organiza husi Komisaun Nasionál Eleisoens (CNE), nia dehan husu ba lider partidu polítiku sira bele haksesuk malu ba maibé ho laran haksolok.
“Ho laran haksolok mak ha’u haree maluk reprezentante partidu polítiku sira tuur iha fatin ida ne’e, atu haksesuk, oin ba oin kona-ba sa programa polítiku mak ida-idak hanoin atu hala’o, ka hanoin oin seluk mak ida-idak iha, atu konfiansa povu nian ba tuur iha órgaun lejizladór Parlamentu Nasionál no kaer Governu tinan lima oin mai,” dehan Xefe Estadu bainhira partisipa debate partidu polítiku iha edifísiu CNE, Kaikoli-Dili, horisehik.
Liu husi debate ne’e, Lú-Olo dehan, lider partidu polítiku sira hato’o sira nia programa kle’an no klaru liután ho matenek no laran moos ba povu tomak no ba votante sira.
Tuir nia haree durante kampaña, polítiku na’in sira ho sentidu responsabilidade no respeitu ema seluk ninia direitu nu’udar ema.
“Ita halo nu’udar sinál pás ba timoroan sira, pás ne'ebé sei buras hanesan ai-horis ita kuda hela”, dehan Lú-Olo.
Ne’e duni, ba oin Xefe Estadu fiar metin partidu polítiku sira sei kontribui ba pás no estabilidade, nune’e sei halo tuir dixiplina no respeitu ba orden públiku, mezmu sira bele hakilar malu tun-sa’e iha estrada públiku.
