Ministru Administrasaun Estatál, Dionísio Babo Soares hatete, orsamentu daudaun ne’e iha kontinua husi eleisaun Prezidensiál ESTATAL prevé tokon $2-resin, tanba sentru votasaun ho estasaun votu aumenta hodi presiza aumenta mós orsamentu.

Nune’e, planu sira ne’e tuir nia, sentru votasaun ba eleisaun lejizlatura períodu 2017-2022 hamutuk 843 ho totál estasaun de votu 1.118. Nune’e sentru votasaun iha rai li'ur mós aumenta barak.

“Osan ami prevé tiha ona, maibé ami espera katak Milaun $2 tan osan sira ne’e sei sentraliza dotasaun governu”, dehan nia, bainhira distribui materiál sensitivu bulletin votu ba munisípiu no rai liu, Sesta (14/7).

Nia hatutan, Estatál prevé orsamentu pur-volta tokon haat ba primeiru ministru hodi aloka ba operasionál brigada ho tékniku sira, tanba durante ne’e sira iha terrenu.

Nia dehan, osan hirak ne’e la’ós estatál maka kaer, maibé sei sentraliza hotu iha dotasaun governu nian, STAE rasik hato’o pedidu ba primeiru ministru maka foin bele hasai orsamentu sira ne’e.

Ministru ne’e informa katak, planu ba eleisaun lejizlatura rasik hahú iha tinan kotuk kedas, tan ne’e tama ba eleisaun orsamentu sira aloka ona.

Alende ne’e, ministru rasik mós husu ba fiskais ho observadora sira labele dukur bainhira prosesu eleisaun hahú. Bainhira iha fallansu iha, presiza halo reklamasaun tuir lei.