Ne’e duni, eis-gerrilleiru ne’e husu ba Governu atu tau atensaun másimu ba atividade kompañia Xina nian iha tasi Timor, tanba esplora hotu ikan iha área tasi mane nian.

Lere dehan, Forsa Komponente Navál nia kbiit la sufisiente hodi halo kontrolu ba atividade peska ne’ebé kompañia husi Xina halo iha tasi Timor ne’ebé Governu Timor kontrata.

“Bainhira la tau matan ho di’ak, hakfodak mai hela bee moos de'it”, dehan nia, iha ninia diskursu, iha Komponente Navál Hera, horisehik.

Nune’e Jenerál fitun rua hateten, matan manas ba rikusoin sira iha tasi laran kompañia ne’e ra'ut lakon hotu, tan ne’e governu mós presiza loke matan ba asuntu ne’e.

Lideransa F-FDTL ne’e haktuir, daudaun ne’e Instituisaun F-FDTL iha sentru operasaun mariña maibé fasilidade ró la-iha, entaun sentru ne’e rasik paradu la kontrola atividade peska iha tasi Timor.

Nune’e Lere Dehan, bainhira Instituisaun Governu la koordena di’ak ho Komponente Navál hanesan fallansu boot ba Estadu ne’e.

Tanba ne’e, nia afirma katak servisu ba seguransa iha tasi presiza koordenasaun di'ak hodi instituisaun F-FDTL. Alende ne’e, atu serve ba tasi tenke iha nasionalizmu ho patriotizmu ba Nasaun ho dignu.

Seguransa Tasi La Másimu

Entretantu, Xefe Estadu Maiór Jenerál F-FDTL hateten, jeografikamente tasi Timor luan liu rai maran, patrullamentu iha rai maran kada loron sempre halo, maibé ba tasi menus tebes.

“Na’ok-teen barak maka moris hanesan peska ilegál, sira sempre mosu iha ita nia tasi laran”, tenik Lere.

Nune’e, nia dehan, bainhira operasaun iha tasi la másimu konserteza mosu atividade tranzasaun ilegál ho peska ilegál sempre akontese iha rai laran.

Tanba ne’e, Komandante F-FDTL ne’e husu ba Polisia Tasi ho Polisia Fronteira tenke fó atensaun másimu ba seguransa tasi ho dignu, atu labele mosu atividade peska ilegál tranzasaun ilegál iha tasi laran hodi fó risku ba Nasaun.