Ministru Edukasaun, António da Conceição hateten, hafoin halo investigasaun ba kazu ne’ebé akontese ba bolseiru timoroan iha Kabuverde, identifika iha timoroan balun mak envolve hodi hamosu situasaun ne’e.

“Ema ruma husi Timor obriga sira ne’e, ‘pendekatan politik’ sira ne’e maka hodi hamosu situasaun sira hanesan ne’e, hodi hamosu problema”, tenik nia, iha knaar fatin, Vila-Verde, horisehik.

Nia hatutan, Ministériu Edukasaun halo ona kontakta ho estudante sira iha Kabuverde no sira konkorda atu kontinua nafatin sira ninia estudu iha rai ne’e.

Bolseiru timoroan laiha buat ida, koordenadór ho estudante sira konkorda ona hodi nafatin kontinua eskola iha universidade ne'ebé bolseiru eskola ba.

Iha fatin hanesan, Diretór Jerál ME, Antonino Pires hateten, kona-ba problema ne'ebé akontese ba bolseiru ne'ebé eskola iha Kabuverde Hamutuk 43 ne'ebé iha universidade tolu hanesan universidade públiku, universidade privadu rua Mindelho no João Piace.

Kona-ba informasaun detallu akontesimentu ne’e, nia dehan, ekipa verifikasaun maka hatene liu, maibé ekipa ne’e sei iha hela Kabuverde.

Informasaun klaru sei fó sai ba públiku bainhira ekipa verifikasaun ne’e fila ona mai Timor-Leste.

Antes ne’e, jornál INDEPENDENTE publika ona katak Bolseiru na’in 43 ne'ebé hala’o hela estudu iha rai Áfrika, Kabuverde, hetan asaltu husi bandidu iha rai ne’ebá, iha Sábadu (21/5).

Iha akontesimentu ne’e, rezulta bolseiru ida ho naran Acácio sai vítima ne’ebé iha tentasaun husi bandidu sira atu oho nia, maibé la realiza tanba konsege salva-aan husi ema sira ne’e.

Entretantu, tuir informasaun, ema ne'ebé asaltu bolseiru timoroan ne’e hetan tiru husi polisia parese ema ne’e mate.