Provedór Silvério Pinto Baptista hateten, monitorizasaun ne’e deteta sei iha nafatin funsionáriu públiku envolve nafatin iha atividade kampaña iha oras servisu nian.

La’ós ne’e de’it, funsionáriu públiku balun mós utiliza patrimóniu Estadu hodi hala'o kampaña.

Nune’e, iha mós partidu polítiku balun mak hala'o kampaña la tuir oras no fatin ne’ebé hasai ona iha CNE katak iha partidu ne’e komísiu oráriu iha fatin ida ne’e, maibé monitora sira ne’e ba fatin kampaña, partidu polítiku sira la marka prezensa.

“Ne’e katak sira kontra ona oráriu kampaña ne’ebé CNE fó sai”, tenik nia, iha edifísiu PDHJ, Kaikoli-Dili, horisehik.

Iha mós partidu polítiku balun sira halo kampaña iha fatin públiku hanesan merkadu tradisionál. Tuir loloos merkadu ne’e labele halo kampaña, tanba fatin halo kontratu entre kompradór ho vendedór sira.

Tuir PDHJ nia peskiza, sei iha mós partidu balun mak envolve ho labarik sira ne'ebé kontra ona konvensaun direitu labarik nian.

“Ita haree iha partidu polítika balu halo kampaña labarik sira barak mak nakonu iha karreta laran. Ita fó atensaun ba partidu polítika sira tanba hanesan ne’e fó risku ba labarik sira nia vida”, tenik nia.