Kompaña Sali-Magu sei hato’o pedidu estensaun ba kontratu bainhira prazu kontratu remata iha 27 Marsu 2024 ne’e maibé fabrika seidauk produs hotu aimoruk ne’ebé kompaña sosa.

Diretór Kompaña Sali-Magu Unipesoal, Lda. Sansão Gomes informa, daudauk ne’e nia parte hein hela fabrika sira atu haruka orariu haruka sasan ka Shipping Schedule, nune’e bele hatene to’o iha 27 Marsu item hira mak bele hatama.

Sansão dehan, nia parte husu ona ba fabrika sira atu halo justifikasaun ba orariu produsaun ka Production Schedule, hahú husi sira simu Down Payment (DP) to’o produsaun remata.

Se to’o iha 27 Marsu mak sasan balun sei iha hela prosesu produsaun, nia hatutan, nia parte sei lori Production Schedule ne’e ba hatama iha governu hodi bele hetan konsiderasaun.

“Bele iha posibilidade atu estende tan kontratu tanba kestaun ida prosesu produsaun sira ne’e. Ha’u fiar katak bele mós estende kontratu tan ida ne’e. Importante mak justifikasaun husi fabrika sira ne’e,” dehan Sansão ba Jornalista Jornal INDEPENDENTE, iha nia knar-fatin, Delta I, Kinta (29/02).

Sansão fiar katak, bainhira governu estende tan sira-nia kontratu ba fulan ida, aimoruk ne’e sei kompletu liu tan.

“Kestaun ninia orariu ne’e so fabrika mak halo justifikasaun, ami lori ba hatama iha projetu na’in dehan katak ‘justifikasaun husi fabrika mak ne’e, konsidera took ba, karik kontratu mate mak seidauk tama kompletu, bele estende hodi hein kompletu ka halo nusa? Maibé ami fiar katak Abril laran sira ne’e kuaze kompletu liu tan. Karik sira bele estende fulan ida tan,” Diretór ne’e dehan.

Tuir nia, prosesu sosa no hatama aimoruk ne’e la’os fasil, tanba fabrika laos atende de’it kompaña ida nian, maibé iha barak mak sira atende.

Nia fó ezemplu ba kompaña ida iha Banglades ne’ebé nia parte hameno desde fulan Dezembru 2023 no halo ona DP iha fulan Janeiru 2024 ba aimoruk esensial kuaze item 41, maibé nia prosesu produsaun sei lao hela.

“Produsaun lao hela, ami agora hein hela, parese Segunda (4 Marsu) sira sei haruka Shipping Schedule mai par ami bele lori fali ba INFPM,” dehan nia.

Sei husu hasai aimoruk item 15 husi kontratu

Kompaña Sali-Magu daudauk ne’e mós haree hela oinsa atu husu ba Ministériu Saude (MS) hodi hasai aimoruk item 15 husi kontratu.

Sansão hatete, ninia kompaña hasoru hela difikuldade atu hatama aimoruk item 15, tanba aimoruk hirak ne’e tama iha kategoria droga ka bolu Unquoted Items.

“Uluk bainhira oferese ba emprezariu barak, hotu-hotu retira. Tanba nia prosesu ne’e la fasil, nasaun sira ne’ebé produs ne’e sira la halo esportasaun enkuantu ita-nia governu la fó ba sira buat ne’ebé bolu Import Permit,” dehan nia.

Iha fulan kotuk, nia dehan, nia parte koko haruka kart aba Diresaun Nasionál Medikamentu no Farmasia, Ministériu Saude, atu hasai Import Permit ba aimoruk item ida de’it, nune’e sira bele haruka ba nasaun sira ne’ebé produs aimoruk ne’e. Maibé fulan ida ona DNMF seidauk hasai dokumentu refere.

“Ne’ebé agora ami hanoin hela, ami atu halo fali karta ida ba Ministériu Saude, karik 15 item ne’e hasai tiha husi kontratu, tanba defisil tebes.”

“Tanba tuir sira informa mós katak, tuir dekretu lei ida hatete aimoruk sira ne’e so governu mak direitamente sosa.”

“Ne’ebé ami sei tenta atu hato’o pedidu ba, se lei hatete hanesan ne’e duni, husik ba governu mak direitamente sosa, hasai tiha de’it husi ami-nia kontratu par labele difikulta fali sasan sira seluk ne’ebé ami bele hatama,” dehan Sansão.

Aimoruk kontentór ida tama iha 4 Marsu

Tuir informasaun husi parte Sali-Magu, iha 4 Marsu ne’e aimoruk kontentór ida ne’ebé sosa husi Indonezia sei to’o iha Timor-Leste.

Diretór Kompaña Sali-Magu, Sansão Gomes hatete, iha Shipping Schedule husi fabrika produsaun aimoruk iha Indonezia, aimoruk kontentor ida ho item rua mak ho todan kilograma rihun 160 sei to'o iha 4 Marsu.

“Se ita baku ba tonelada karik, ne’e kuaze 16 ou 17 ton. Signifika katak aimoruk kuantidade rua mais barak,” dehan nia.

Sansão dehan, nia parte sosa ona aimoruk, konsumaveis no produtu mediku sira ne’e kuaze item 200.

“Ita espera katak balun ne’ebé ready ne’e sira bele haruka ona iha Marsu nia laran. Balun sira bolu indent, indent ne’e sei hein, sei halo produsaun lai, maibé pagamentu ne’e ami halo hotu ona.”

Diretór ne’e fiar katak iha fulan Marsu nia laran, sasan barak mak sei to'o iha Timor-Leste hodi responde problema stock out ne’ebé iha.

Sali-Magu sai Consignee, INFPM mak Notify Party

Relasiona ho polemika kona-ba Consignee no Notify Parte iha aimoruk kontentór tolu ne’ebé Sali-Magu hatama, nune’e ba aimoruk sira seluk ne’ebé sei tuir mai, iha ona konkordansia ho Institutu Nasionál Farmasia no Produtu Mediku (INFPM) atu Sali-Magu mak sai Consignee no INFPM sai Notify Party.

Sansão hatete, molok ne’e sira tau INFPM sai nu’udar Consignee tanba desde tempu SAMES halo ona hanesan ne’e. Ida ne’e atu fasilita prosesu clearance iha Alfandega.

"Agora INFPM aseita ona ba oin prosesu ami empreza nia naran iha Consignee no INFPM hanesan sasan-nain muda ba iha Notifu Party. Ida ne'e ami konkorda malu ona katak aimoruk ne'e sei tama iha loron 4 Marsu agora, ami mak Consignee no sasan-nain INFPM mak Notify Party," nia deklara.

Entretantu, kona-ba aimoruk no produtu mediku ne’e sosa husi nasaun ne’ebé de’it, Diretór ne’e dehan, nia parte sosa husi Indonezia, Banglades, Singapura no Australia.

“Produtu reajente 118 item husi Singapura. 31 item hameno fali husi Australia. Maioria husi Indonezia,” dehan nia.