Lusia, komunidade husi Akadiru-huun, Munisipiu Dili, durante tinan naruk nia laran sofre moras Diabetes, ne’ebé obriga nia atu tenke konsumu aimoruk ho rutina.

Maske sofre moras diabetes ho tempu ne’ebé kleur ona, maibé Lusia kontinua reziste ho apoiu husi aimoruk ne’ebé nia konsumu rutinamente.

Maibé problema hahú mosu bainhira Klinika Moris Foun ne’ebé durante ne’e sai fatin ba Lusia hodi hetan aimoruk insolin, taka. Sa tan, aimoruk ne’e tama mós lista aimoruk illegal no hetan prende husi autoridade seguransa no ekipa husi Ministériu Saude.

Tanba la konsege hetan aimoruk tuir nia tempu, Lusia tenke simu konsekuensia. Diabetes ne’ebé nia sofre hahú kria infeksaun, alastra ba nia rins no afeita mós ba nia fuan.

“Ama sofre diabetes tinan barak ona. Durante ne’e nia konsumu anti-biotiku balun no insulin maibé aimoruk (insulin) ne’e laiha, entaun afeita ba nia moras hodi kria infeksaun depois alastra ba nia rins no afeita ba nia fuan,” informa Lusia nia oan mane, Natalino Evangelista, ne’ebé hein nia inan baixa iha Unidade Sirurjia, sala emerjensia Hospital Nasionál Guido Valadares, Kinta (29/02).

Natalino ne’ebé durante ne’e ba sosa aimoruk iha Klinika Moris Foun hatutan, tanba nia inan sofre ona moras ne’e durante tinan barak nune’e aimoruk ne’e labele falta. Se falta bele fó konsekuensia boot.

Natalino dehan, insulin iha ninia prazu. Tan ne’e bainhira to’o prazu ne’e remata labele uza ona no tenke sosa foun.

Iha semana kotuk, nia dehan, tanba hetan informasaun husi parte klinika Moris Foun katak aimoruk ne’e iha, nia hakat ba klinika refere ho intensaun atu sosa, maibé sorte at, tanba bainhira to’o iha ne’ebá autoridade sira taka ona klinika refere.

“Aimoruk ne’e labele hola tablet rua, tenke hola ida, depois ida hotu tiha mak hola fali, entaun tablet ida ne’e hotu tiha mak ha’u atu ba hola maibé tarde ona. Entermu iha problema uitoan, polisia, saúde taka tiha klinika ne’e,” dehan nia.

Ho nune’e, nia hatutan, nia parte la konsege hetan aimoruk ne’e no ikus mai afeta ba nia inan ninia saude no tenke baixa iha HNGV.

“Agora (Lusia) iha médiku no kardiolojista sira-nia liman, sira mak sei halo atendimentu,” dehan Natalino.

Maske nune’e, Natalino dehan, kondisaun iha Timor-Leste mak nune’e duni, aimoruk no buat barak mak falta iha fasilidade saúde sira.

“Maibé ha’u lakohi hatudu liman ba ida ne’e ka ida ne’ebá, tanba ida ne’e mak realidade Timor nian, maibé ita mak tenke servisu maka’as hodi hasa’e kualidade no sai profisional ba area hotu-hotu” dehan nia.

Ba kestaun ne’e, parte Klinika Moris Foun konfirma katak iha duni pasiente ida ne’ebé presiza tebes aimoruk insulin, maibé molok mai foti aimoruk refere, autoridade sira halo ona buska no aprensaun ba Klinika refere.

Ho situasaun ne’e, Klinika Moris Foun tenke taka durante loron lima, hahú husi 22 Fevereiru, no foin loke fali iha 28 Fevereiru.

Maske hahú loke iha 28 Fevereiru, maibé parte Klinika seidauk bele informa ba familia pasiente sira, inklui Natalino, atu foti aimoruk, tanba autoridade seidauk intrega aimoruk hirak ne’ebé prende.

Iha 29 Fevereiru, hafoin autoridade entrega hikas aimoruk insulin item rua ba klinika Moris Foun.

Hafoin simu aimoruk ne’e, parte Klinika kontaktu kedan familia pasiente ne’ebé presiza, inklui Natalino.

“Ami kontaktu familia pasiente ida atu mai foti insulin, maibé nia hataan dehan pasiente ne’e baixa hela iha ospital nasionál, se presiza mak nia mai foti,” informa parte klinika.

Molok ne’e, Diretór Klinika Moris Foun, Dedi Irawan hato’o ninia preokupasaun relasiona ho aimoruk hirak ne’ebé autoridade prende, tanba iha aimoruk balun ne’ebé pasiente sira presiza atu konsumu lalais.

“Aimoruk ba pasiente ho moras fuan, insulin ka diabetes mós prende hotu. Iha interogatoriu dahuluk mós ami hato’o kona-ba problema ne’e, Juiz mós hatete katak aimoruk ne’ebé urijente ne’e bele fó fila. Ha’u agradese tebes ba desizaun husi Juiz ne’e,” dehan nia.

Entretantu, iha 21 no 22 Fevereiru, Autoridade Seguransa ezekuta mandadu husi Tribunal hodi halo buska no aprensaun ba Klinika Moris Foun.

Iha buska ne’ebé hala’o durante loron rua ne’e, autoridade prende aimoruk item 350 ne’ebé konsidera illegal.

Autoridade mós detein jerente klinika Moris Foun na’in tolu ho inisial J, DI no HdC.

Krime ne’ebé imputa ba jerente klnika Moris Foun mak krime Frauda Fiskal ne'ebé previstu iha artigu 314, no Krime Bens ka Merkadoria ne'ebé previstu iha artigu 315, 316, 317, 303 no 304 Kodigu Penal.

Iha 24 Fevereiru, liu husi interogatoriu dahuluk, Tribunal Judisiariu Primeira Instansia Dili deside hodi aplika medida koasaun aprezentasaun periodika fulan ida dala ida ba Ministériu Públiku no eskuadra polisia, proibizaun auzensia, no medida kausaun ho valor $5.000.

Iha ninia desizaun, tribunal mós husu ba parte klinika atu hala’o hikas sira-nia atividade hodi fó atendimentu ba komunidade sira ne’ebé presiza.