Kordenadora Grupo Traballo Reforma Justisa Lúcia Lobato hatete, Igreja Katólika komponente ida ne’ebé importante tebes iha sosiedade nia leet tan ne’e sira hasoru Arsepispo tuir konvite ne’ebé sira fó ona hodi husu Igreja Katólika nia hanoin no apoiu ba servisu Justisa nian.

Nia dehan, ema hotu-hotu konkorda, igreja kátolika iha papél importante atu ápoia justisa ne’ebé loos, lalais no justisa ida ne’ebé hanesan ba ema hotu.

“Iha biban ida ne’e ami hasoru malu ho Amu Bispo no informa servisu ne’ebé durante ne’e halo, liliu grupu ne’e mai apoia governu liu husi gabinete ne’ebé mak ha’u servisu ba atu hasoru rekomendasun barak no oioin ba kurtu, médio no longu prazo ne’ebé sei hato’o ba Primeiru Ministru iha fulan-Marsu nia laran,” dehan Koordenadora iha Lecidere, Sesta (01/03).

Nia afirma, husi parte igreja nia mós hanoin servisu ba reforma justisa ne’e mós importante tan ne’e igreja sei halo saida de’it mak bele hodi apoiu grupu reforma justisa ne’e bele la’o ho di’ak ho susesu nune’e justisa ne’e bele ba ema hotu-hotu.

“Amu Bispo mós hatete katak nia la’o ba fatin-fatin iha Timor laran tomak no haree preokupasaun barak kona-ba ba setór justisa ne’e rasik tanba tinan 2024 ona maibé povu sempre kestiona justisa, lahetan justisa no justisa la’o mos laloos entaun Amu Bispo dehan prekupasaun sira ne’e mak nia hetan iha komunidade nia leet,” dehan Lúcia Lobato.

Nia afirma, Amo Bispo mos rekomenda asuntu ba Grupu Traballo Reforma Justisa mak hadi’a rekursu umanu hadi’a lei no fomasaun ba rekursu umanu, tanba rekursu umanu forma ema ne’e lori tempu, se formasaun la’o ladiak entaun justisa mós la’o la di’ak. Nune’e mos lei barak mak sei mai lian portugués.

Iha biban ne’e, grupu Traballo Reforma Justisa husu parte igreja liu husi Amo Bispo nia disponibilidade atu partisipa semináriu ne’ebé sei realiza iha tempu badak.