Embaixadór Malázia ba Timor-Leste, Amarjit Sarjit Singh hatete, delegasaun setór privadu Malázia intersante hakarak koopera ho governu Timor-Leste iha setór saúde, investimentu ba setór petróliu no gás no seluk tan.

“Enkontru ohin ha’u lori delegasaun setòr privadu hosi Malázia hasoru malu ho PM deskute asuntu importante sira ne’ebé antes ne’e hala’o ona diskusaun mai hodi atualiza fila-fali informasaun téknika sira ba PM kona-ba esforsu sira antes Embaixada Malázia inklui setór privadu Malázia ne’ebé ami konkorda atu dezenvolve sistema saúde ne’ebé di’ak iha TL. No ami deskute mós kona-ba atu dezenvolve setór petrolíferu iha Timor-Leste no investe iha área saúde no seguransa alimentár,” dehan Embaixadór iha Palasiu Governu, Kinta (29/02).

Iha biban ne’e mós, Embaixadór Malázia atualiza mos ba PM kona-ba akordu Governu Malázia no Timor-Leste atu asina akordu formal iha área Aero nian hodi fasilita aviau hosi Malázia semo mai Timor-Leste no aviaun hosi Timor-Leste semo ba Malázia.

“Iha oportunidade ida ne’e mós ha’u atualiza mós ba Primeiru-Ministru Xanana kona-ba asuntu akordu Aero nian ne’ebé sei asina entre nasaun Malázia no Timor-Leste ne’ebé remata ona diskusaun no agora hein atu asina akordu hodi ita bele fasilita aviaun bele semo ona tuir oráriu husi Kuala Lumpur mai Dili no Dili ba Kuala Lumpur iha tempu badak,” nia hato’o.

Nia dehan, durante enkontru, Xefe Governu Xanana agradese no promote sei autaliza informasaun sira ne’e hotu ba membru governu tutela sira atu apoia servisu hotu ne’ebé Timor-Leste no Malazia koopera bele finaliza lalais akordu hirak ne’e iha tempu besik.

Enkunatu, antes ne’e, Governu Malázia mós deklara sei ajuda politika desentralizasaun ne’ebé IX Governu Konstitusionál sei implementa iha Timor-Leste.