Sekretariu Estadu Formasaun Profisional no Empregu (SEFOPE) prepara ona esbosu ba revizaun salariu minimu ne’ebé sei aprezenta ba Konsellu Ministru iha tinan oin.

Sekretariu Estadu, Rogerio Araujo Mendonça informa, valor husi salariu minimu bazeia ba esbosu ne’ebé SEFOPE prepara mak $135 to’o $150.

“Agora esbosu ne'e iha hela Sekretariu Estadu Formasaun Profisional no Empregu, ita fiar katak iha tinan 2024 sei lori salariu minimu ho $135 to'o $150 aprezenta ba Konsellu Ministru atu nune'e bele hetan aprovasaun,” dehan Rogerio iha salaun Timor Plaza, Dili, Segunda (09/10).

Nia hatutan, atu tau salariu minimu boot liu mós presiza haree ba kapasidade empreza sira atu selu.

Tanba, nia dehan, maioria trabaladór servisu iha loza no merkadu. Tan ne’e se fó salariu boot bele prejudika sira-nia negosiu.

Hatan kona-ba montante ida ne’e sufisiente ka la sufisiente, Rogerio dehan, atu hatene ida ne’e presiza liu husi peskiza ida.

“Parte governu ho empregador propoin ho salariu $135 to'o $150,” nia afirma.

Molok ne’e, Prezidente Konfederasaun Sindikatu Timor-Leste (KSTL), Almeiro Vila Nova hatete, salariu minimu ne’ebé daudauk ne’e eziste, $115, la serve ona atu kontinua implementa.

Almerio fó ezemplu, se trabaladó ida simu salariu $115, selu fatin ba hela $50, sosa foos $20, sa’e mikrolete ba servisu $30 kada fulan, no hela $15 hodi atende nesesidade seluk, nune’e posibilidade boot atu nia deve fali osan.

“Nia simu fali $115 ne'e taka fali ba nia deve, atu haan de'it mós la to'o, ne'ebé buat sira ne'e mak sai fator hamosu problema ne'e,” dehan Almerio hafoin re-eleitu ba Prezidente KSTL, Sesta (06/10).

Tan ne’e, nia rekomenda ba governu atu tau konsiderasaun sériu ba esbosu lei salariu minimu hodi aselera.

Tuir nia, inflasaun kada tinan sempre prejudika ema barak nia moris, maibé salariu minimu kontinua mantein kuaze tinan 11 ona.

“Ne'ebé Governu hanoin ba ho fuan katak ema barak tebtebes ho nia família iha kotuk ne’ebá ne'e moris iha susar laran. Agora daudaun folin foos fó impaktu boot ba sasan hotu-hotu, inflasaun, mina kombustivel folin sa'e ninia afeita ne'e husi foos folin sa'e iha mundu, ne'ebé Governu tetu ida ne'e.”

Nia mós husu ba SEFOPE atu promove negosiasaun koletiva. Tanba estadu TL ratifika ona kontensaun 98 kona-ba direitu ba organiza aan no negosiasaun koletiva.

“Promove negosiasaun koletiva ne'e par parte rua forte atu halo negosiasaun ba salariu ne'e, se lae mak bu'at rua ne'e ita la hetan hotu, terus nafatin, mudansa ba nia moris laiha sei hamosu problema sosiál ne'ebé boot liu tan iha ita-nia rai," nia dehan.

Nia hatutan, traballu infantil no traballu minoridade sei kontinua beibeik, violensia domestika sei kontinua beibeik, no ema barak bele mak halakon nia vida tanba frustadu ho ninia moris.

“Ne'ebé buat sira Governu tenke hanoin tetu fila fali ba, tanba desizaun ne'e hadia ema hotu-hotu nia moris, ne'ebé konsidera ida ne'e mak importante,” Almerio husu.

Iha fatin hanesan, Reprezentante Sekretáriadu Estadu Formasaun Profisional no Empregu (SEFOPE) no atual Vise Prezidente Konsellu Nasionál Traballu, Angelo Santos Veloso hatete, SEFOPE komprometidu ona katak iha vontade atu haree issu salariu minimu.

"Ha'u fi'ar katak ita-boot sira rona hotu ka ita-boot sira mós husu ona ami-nia Sekretariu Estadu ninia esplikasaun katak iha vontade par haree salariu minimu, ne'e importante, maibé ne'e desizaun politika, ha'u labele to'o iha ne’ebá, maibé nia iha vontade duni par atu haree issu ida salariu minimu ne'e, mais kestaun aprova la aprova teknikamente ami labele to'o iha politika na'in sira," nia dehan.