Tuir informasaun ne’ebé Jornal INDEPENDENTE hetan husi fonte importante balun katak, posibilidade boot Membru Governu na’in ualu mak sei sai.
“Iha Ministru na’in haat, Vise Ministru na’in ida no Sekretariu Estadu na’in tolu,” informa fonte ne’e.
Iha tempu badak nia laran, fonte ne’e hatutan, sei hasai uluk Ministru na’in rua. Hafoin ida ne’e mak sei hasai tan Membru Governu na’in neen seluk.
“Ministru na’in rua ne’e sei hasai iha tempu badak ne’e. Sira seluk ne’e sei tuir.”
Kona-ba razaun hasai membru governu hirak ne’e, fonte ne’e hatete, ida ne’e iha relasaun ho sira-nia dezempeñu servisu.
Aleinde Membru Governu ne’ebé sai, fonte ne’e hatutan, iha mós membru governu balun ne’ebé hetan ‘promosaun’.
“Husi Vise Ministru sa’e ba Ministru. Iha mós Ministériu rua ne’ebé sei tau hamutuk sai ida de’it, hanesan Ministru Koordenadór ida,” nia dehan.
Molok ne’e, tuir informasaun, PM Xanana sei hasai membru governu ho nivel ministru na'in rua (2) no vise ministru ida (1).
"Membru governu ida ne'ebé pozitivu ona atu hasai mak Vise Ministru Finansas, Helder Lopes," dehan fontes besik Primeiru Ministru, ne'ebé lakohi publika ninia identidade.
Helder rasik sei promove nu'udar Governadór Banco Central Timor Leste (BCTL) hodi substitui, Abraão de Varconcelhos, ne'ebé ninia mandatu remata ona.
Tuir planu, Governadór foun BCTL, Helder Lopes sei hahú halao servisu iha loron 13 Setembru 2023.
Figura ne'ebé atu troka Helder Lopes mak Felicia Carvalho, ne'ebé antes ne'e servisu iha gabinete eis Ministra Finasas, Emilia Pires. Daudaun ne’e Felicia hala'o hela knaar nu'udar asesora iha Ministériu Solidariedade Sosiál no Inkluzaun (MSSI).
Aleinde Helder, iha mós ministru na'in rua seluk ne'ebé tama iha lista remodelasaun. Maski nune'e, diskusaun kona-ba na'in rua ne'e foin mak atinze 75%.
Entretantu, 7 Setembru ne’e, Prezidente Repúblika, José Ramos Horta, dekreta ezonerasaun ba Helder Lopes husi nia kargu nu'udar Vise Ministru Finansas.
Tuir karta ezonerasaun ne'ebé Jornal INDEPENDENTE asesu husi Palasiu Prezidensia, Sesta (08/09), PR Horta dekreta ezonerasaun ne’e bazeia ba proposta husi Primeiru Ministru, Kay Rala Xanana Gusmão.
Dekretu ezonerasaun ne’e PR Horta asina iha 7 Setembru tinan 2023 no tama vigór iha data publikasaun.
