Ministru Francisco hatete, governu foti ona desizaun atu reativa polisia reformadu 158, tan ne’e Komando PNTL tenke kumpre.

"Kuandu governu deside atu rezolve membru PNTL reformadu, atu reintegra sira, tama fali, atu fó onra ba sira-nia servisu, Komandu PNTL tenke kumpri. Se Komandante Jerál PNTL la kumpre asuntu ne'e liga ho governu atu halo servisu, Komandante Jerál PNTL na’in rua ba deskansa," dehan Francisco ba jornálista sira hafoin partisipa iha aprezenta jornada Orsamentu Jeral Estadu (OJE) 2024, iha Ministériu Finansas, Tersa (12/09).

Maske nune’e, Ministru ne’e dehan, fulan Setembru foin tama loron 12. Nia hein Komando PNTL sei kumpre desizaun governu molok fulan ne’e remata.

“Fulan Setembru ne'e seidauk hotu, agora foin loron 12, sei kleur,” dehan nia.

Kona-ba informasaun katak Komando Jeral PNTL rejeita karta husi MI atu reativa reformadu 158, Ministru ne’e hatan, nia sei lori asuntu ne’e ba Konsellu Ministru atu rezolve.

"Se nia rezeita, ha'u mak sei lori nia ba Konsellu Ministru atu rezolve nia problema," dehan Francisco.

Ba kestaun ne’e, Jornalista Jornal INDEPENDENTE tenta konfirma ho komandante Jerál PNTL, Komisariu Jerál Henrique da Costa, maibé Komisariu ne’e rekuza fó komentariu.