Prezidente Tribunal Rekursu, Deolindo dos Santos hateten, Tribunal Rekursu simu ona pedidu rua (2), ne’ebé mai husi Parlamentu Nasional no Prevedoria Direitu Humanus Justisa (PDHJ) kona-ba fiskalizasaun abstrata ba lei estatutu reforma membru PNTL nain 158.
Nia haktuir, pedidu fiskalizasaun abstrata husi PDHJ nian ko’alia kona prosesu méritu, ne’e duni labele pronunsiu, tanba lei la fó dalan ba kualker juis atu fó sai prosesu Tribunál nian ba públiku.
" Prosesu ne’ebé iha hela Tribunál Rekursu, iha pedidu rua (2), ida mai husi PDHJ no ida mai husi Parlamentu Nasionál, tan ne’e Tribunál halo apresiasaun premitasaun la'o normal tanba sei notifika entidade kompetente sira atu hato’o sira nia paraser no tuir loloos deside ona maibé sei iha ferias Judisiál nia laran mak prazu ne’e suspende," informa Deolindo dos Santos ba Jornalista sira iha Parlamentu Nasional (PN), (12/09).
Maibé, bainhira loron feriadu judisiál remata, hafoin bele hare no deside prosesu rua ne'ebé mai husi entidade rua ne'e.
Nia esplika, se lasa pedidu husi Parlamentu Nasional ko’alia kona ba fiskalizasaun abstrata ba estatutu Ministeriu Publiku no pedidu fiskalizasaun abstrata ne'ebe mai husi PDHJ kona-ba lei estatutu PNTL ba reforma membru na'in 158.
Nia haktuir, prosesu pedidu entermus prosesual notifikadu Ministériu Públiku hotu ona no sira resposta ona hein Tribunál atu deside.
Nia akresenta, prosesu analiza ba pedidu fiskalizasaun abstrata kona-ba estatutu lei reoforma membru PNTL na’in 158, desizaun seidauk sai.
"Ida-ne'e kona-ba meritu ona ha'u labele ko'alia desizaun atu metan ka mutin ha'u labele ko'alia ba ita bo'ot sira," nia hakotu.
Molok ne'e, Provedor Direitus Humanus Justica (PDHJ), Virgilio Guterres hato’o pedidu ba Tribuanal Rekursu kona-ba fiskalizasaun abstrata reforma membru PNTL na'in 158.
Nia dehan, pedidu kona-ba konstitusionálidade ba artigu 128 Dekretu-Lei nNmeru 69/2022, loron 28 Setembru kona-ba (estatutu profisional pesoais ho funsaun polisial iha instituisaun PNTL.
“Ohin mai hasoru Prezidente Tribunal Rekursuhodi hatama pedidu fiskalizasaun abstrata, Konstitusionalidade lei estatutu polisia ninian, ne’ebe tuir entendimentu husi Provedor kontra Konstituisaun Artigu 24,” informa Virgilio ba jornalista sira fulan hirak liu ba.
PDHJ uza nia kompetensia tuir konstituisaun Artigu 150 no 151 hodi husu ba Tribunal Rekursu atu deklara konstitusionalidade dekretu lei ne’ebe mak ko’alia kona-ba estatutu polisia nian.
Bazeia ba artigu 128 ratifika ona iha dekretu lei númeru 69/2022 Setembru estabelese rekezitu ba ofisial PNTL bainhira tama ona ba idade reforma.
Nia haktuir, Impedimentu ou hapara ema husi servisu ne’e kompetensia Parlamentu ninian. Governu bele halo maibe lei ne’e tenke hetan autorizasaun tuir integrimentu provedor nian katak dekretu lei ne’ebe durante komandu uza hodi halo reformadu, lei ne’e la hetan autorizasaun husi Parlamentu.
“Komandu Polísia halo prosessu reforma ba polisia sira, ne’ebe mak ita akompanha mosu diferensia opiniaun iha polisia nia laran. Ita hatene katak ofisial polisia atus ida resin ne’ebe mak tenke para sira nia servisu, Tanba ne’e mak ami husu ba tribunal rekursu halo fiskaliza, ba artigu 24 koalia kona-ba liberdade servisu no buka servisu,” hakotu nia.
