Jornada orsamentu 2024 ne’e prezide husi Primeiru Minstru Kay Rala Xanana Gusmão ho objetivu prinsipal husi orsamentu mak atu aumenta kresimentu ekonomiku, hodi fó prioridade ba bem-estar no ba povu nia dezenvolvimentu.
Primeiru Ministru hatete, signifikativu ida husi orsamnetu ne'e sei aloka ba projetu transporte, bee no saneamentu, eletrisidade no komunikasaun. Mellora rede rodaviaria sira no transporte sira sei liga too ba komunidades isoladu sira, promove komersiu no fasilita sirkulasaun bem estar ba bens servisus.
“Ita nia objetivu mak atu promove ambiente ida ne'ebé la’ós deit atrai investimentu estranjeiru, maibé mós kria oportunidade ba ita nia emprendedores lokais no Empreza kiik sira. Bainhira ita apoia setores hirak-né, ita bele liberta ita-nia povo nia potensial tomak no impulsiona (ka dudu ba oin) kresimentu ekonómiku ne’ebé sustentável. Ne’e signifika impulsiona kresimentu la’ós de’it tanba gastus ne’ebé Governo halo," dehan Primeiru Ministru iha Ministeriu Finansas, (12/09).
PM akresenta, IX Governu nia programa prioridade ba iha setor Edukasaun, saúde, agrikultura no rekursu naturais.
Xefe Governu dehan, Timor-Leste nia orsamentu foun refleta IX Governu nia komprimisiu ba nasaun nia bem estar no dezenvolvimentu.
Kresimentu ekónomiku ne'ebé forte iha dezenvolvimentu infrastrutura iha Edukasaun Saude, agrikultura no iha jestaun rekursu no fiar metin iha kapasidade atu harí futuru ida nebé próspero no sustentável ba sidadaun sira hotu.
"Ita tenke hanoin katak implementasaun ho susesu husi orsamentu ida-ne’e ezije kolaborasaun ho envolvimentu husi partes interessadas sira hotu, inklui husi governu, setor privadu, organizasoens husi sosiedade sivil no ita-nia sidadaun sira," tenik PM.
Entretantu, Diretór Jeral Planeamentu no Orsamentu Ministeriu Finansas José Alexandre de Carvalho hatete, jornada orsamentu nia objetivu atu halibur membru governu sira no kamada sosiedade oioin partisipa hotu atu hetan orientasaun politika ba Orsamentu Jeral Estadu (OJE) tinan 2024 nian.
Deretor dehan, Jornada orsamentu mak tempu ne’ebé atu hahú prosesu orsamentu, no ohin mak loron dahuluk atu hahu prosesu orasamentu nee rasik,
“Orientsaun politika ne’e mak ohin Primeiru Ministru hatoo ona hodi nunee bele simu fali informasaun atu nune’e Ministeriu ida-idak lori fali informasaun sira ne’ebe hatoo ona iha jornada orsamentu ne’e atu sira bele prepara sira nia Planu Asaun Anual (PAA), hodi nune’e bele hetan alokasaun orsamentu hodi nune’e sai OJE 2024 nian,” dehan nia.
Diretor afirma, tetu Orsamentu ba tinan 2024 ne’ebe propoin iha proposta haat (4), hahú husi $1.6 ate $1.9 Bilhoes, tetu ida ne’e konsidera ho sustentabilidade fundu minarai nian. Kada tetu ho nia implikasaun iha vida minarai ne’e rasik.
Husi orsamentu ne’ebe propoin iha proposta haat, sei lori $1.9 bilhoes ba Konsellu Ministru bainhira hetan apresiasaun detallu no KM aprova ona mak fó baze ba aprovasaun tetu agregadu.
