Jerente na’in tolu ne’ebé autoridade detein kompostu husi sidadaun Indonezia na’in rua ho inisial J no DI, no sidadaun Timor-Leste ida ho inisial HdC.
Autoridade seguransa sira halo detensaun ne’e bazeia ba mandadu detensaun husi Tribunal Judisial Primeira Instansia Dili (TJPID).
Bazeia ba mandadu detensaun ne’ebé Jornal INDEPENDENTE asesu, Tribunal fó orden ba autoridade seguransa hodi detein suspeitu J, DI no HdC, tanba komete krime fraude fiskal, importasaun sasan illegal, no kontra bandu ne’ebé previstu iha artigu 314, 315, 316, 317, 303, no 304, Kodigu Penal.
Hafoin detensaun, mandadu ne’e hatete, sei aprezenta ba Juiz hodi halo interogatoriu judisial dahuluk, iha oras 72 nia laran, hahú husi momentu detensaun.
Aleinde halo detensaun ba jerente na’in tolu, tribunal mós hasai mandadu buska domisiliariu no aprensaun ba klinika Moris Foun.
Tuir observasaun Jornalista Jornal INDEPENDENTE iha terenu, iha 21 Fevereiru, tuku 03.00 oras Timor-Leste, autoridade seguransa ezekuta mandadu husi tribunal hodi halo buska, prende evidensia balun no kaer mós jerente na’in tolu.
Fonte ida informa, tribunal hasai mandadu ne’e relasiona ho atividade illegal ne’ebé klinika ne’e halo ona durante ne’e.
Klinika ne’e, nia dehan, kontinua halo importasaun ba aimoruk ne’ebé Ministériu Saude bandu ka la autoriza.
“Iha tinan kotuk prende ona aimoruk balun ne’ebé Ministériu Saude bandu, maibé sira kontinua hatama aimoruk ne’e,” dehan fonte ne’e.
Tuir nia, iha tinan ne’e, Klinika Moris Foun halo importasaun ba aimoruk kontentór tolu. Husi lista aimoruk ne’ebé sira aprezenta ba Institutu Nasionál Farmasia no Produtu Mediku, iha 250 item.
Maibé, bainhira halo identifikasaun, nia hatutan, aimoruk ne’e liu item 250, no item hirak ne’ebé liu ne’e nu’udar aimoruk ne’ebé proibidu atu hatama no faan iha Timor-Leste.
Aleinde hatama tan aimoruk ne’ebé bandu, fonte ne’e hatutan, identifika katak Klinika Moris Foun kontinua mós fa’an aimoruk proibidu refere.
“Ohin autoridade prende aimoruk proibidu iha klinika,” nia hatutan.
Tuir planu, iha 22 Fevereiru, ohin, autoridade seguransa sei kontinua halo buska no aprensaun ba armajen Klinika Moris Foun iha area Vila Verde no halo mós buska no aprensaun ba aimoruk kontentór tolu iha Portu Tibar.
