Tuir portavóz, Konsellu Nasionál Profesór Kontratadu Timor Leste(KNPK-TL), Agostinho Pinto hatete, karik mak PM Xanana Gusmão la solusiona mak sira sei nafatin firme organiza demo ou greve boot liu tan hodi defende sira-nia direitu tuir lei ne’ebé vigór iha nasaun ida ne'e.
"Husu ba Primeiru Ministru Líder Boot Kay-Rala Xanana Gusmão atu foti solusaun no hakotu problema ida ne'e lalais no justu ba ami profesór," dehan nia liu husi Konferensia Imprensa, iha Jardim 5 de Maio, Kuarta (21/02).
Tanba durante tempu naruk ona profesór kontratadu sira hala'o kna'ar no misaun ho voluntário tinan 10 liu, no balun liu tinan 20 ona hodi fasilita aula ba estudante sira iha eskola hotu-hotu iha teritório nasional inklui asegura ezame nasionál ne'ebe kada tinan realiza.
Tanba ne'e husu mós ba Ministra Edukasaun (ME), Dulce de Jesus atu para ona ho ninia arogánsia, hodi loke matan haree didiak lei no dekretu lei ne'ebé iha.
"Husu ba Ministra Edukasaun atu fo solusaun lalais hodi hakotu probema ida ne'e tanba impaktu ba probema profesór kontradu sira nian, hodi fó mós impaktu no violasaun ba alunos sira-nia direitu, no husu atu para ona ho ita-boot nia arogánsia, hodi loke matan hare didiak lei no dekretu lei ne'ebe iha," nia husu.
Portavós hatutan, Tanba iha tinan 2023 maka governu anteriór foin hasa'e nível profesór sira voluntáriu bá kontratadu ho estatatu ajentes administrasaun públika ne’ebé rekrutamentu liu husi Dekretu Lei N.º 22/2011 ,08 de Juñu ho totál profesór hamutuk 1.715.
Maibé ikus mai, Ministra Edukasaun no Sekretáriu Estadu ho nia asesór inkapasidade sira hapara pesoál profesór kontratadu sira husi tinan 2022 no tinan 2023 la basei-ba Lei N.º 31/2023, maibé baseia ba orientasaun desizaun polítika ódio no vigansa hodi hapara profesór kontratadu sira nu'udar forma injustisa ida ne'ebe kontra prinsipiu konstituisaun RDTL artigu 6.° kona-ba objetivu estadu nian, no Artigu 50.° kona-ba Direitu ba Servisu.
Portavós ne’e realsa, ME ho nia asesór legál Filipe Ximenes Rodrigues no Yazalde Pereira nia deklarasaun no komunikadu impressa iha iha loron segunda-feira, 19 Fevereiru 2024 no iha okaziaun enkontru hamutuk ho FONGTIL no ME nia asesór na’in-2, dehan pesoal profesór kontratadu 2022 no 2023 la iha ona relasaun jurídiku ho Ministériu Edukasaun otomatikamente bainhira kontratu termina iha dia 31 de Desembru.
"No atu hateten katak, deklarasaun ne'e bosok-ten no hatudu katak sira na’in-rua ne'e la entende Lei estatutu Funsaun Públika maibé entende liu fali termo kontratu sertu ne’ebé prosedurál administrativu de’it, Iha lei estatutu funsaun públika N.º 5/2009, 15 de Julho, artigu 3.º koalia kona-ba Funsionariu Públiku no Ajente Administrasaun Públiku," nia hakotu.
