Asuntu ne’e Embaixadór hato’o, hafoin enkontru ho Primeiru Ministru (PM), Kay-Rala Xanana Gusmão, hodi deskute kooperasaun entre rai rua nian. Hafoin enkontru nia kompromitidu sei fó apoia formasaun lian Portugés ba profesór sira iha Timor-Leste.
Embaixadór Repúblika Mosambike non Rezidénsia, Belmiro José Malate relata katak, Timor-Leste sai nu’udar maun no alin ho povu Moçambike nian presiza servisu hamutuk hodi hadia kualidade edukasaun rai rua nian kontribui ba preparasaun rekursu foin sa’e sira iha futuru.
“Ha’u mai hasoru malu ho Primeiru-Ministru hodi promove liu tán relasaun amizade entre Moçambike no Timor-Leste. Durante enkontru ne’ebé ha’u ho Primeiru Ministru diskute asuntu sira ligadu ho kooperasaun entre país rua," dehan nia hafoin reuniaun ho PM Kay iha Palásiu Governu, Kuarta (21/02).
Nia haktuir, troka hanoin ho Xefe Governu oinsá bele fó formasaun ba profesóres sira, tanbá dezafiu boot ne'ebé durante iha TL hasoru mak língua.
"Ami mós troka hanoin ba malu ligadu ho formasaun ba profesór Portugés ne’ebé sai hanesan dezafiu boot ba Timor-Leste iha ensinu lian Portugés,” nia dehan.
Molok implementa programa hirak ne’e, Governu Moçambike no Timor-Leste sei estabelese uluk akordu formál nune'e bá oin bele kontinua iha serbisu hamutuk ne'ebé di'ak.
Moçambike mós prontu atu apoia TL hanesan kapasitasaun kuadru, ne’ebé Moçambike iha esperiénsia no kapasidade hodi ajuda Governu TL hodi forma ninia kuadru sira kontribui ba dezenvolvimentu.
