Iha Sesta (27/03), PR Lu Olo ofisialmente deklara Timor-Leste tama iha periodu estadu emerjensia hahú husi 28 Marsu no sei remata iha 26 Abril 2020.

Maske nune'e, tuir observasaun jornalista INDEPENDENTE, iha estadu emerjensia loron dahuluk, komunidade balun iha kapital Dili sei kontinua hala'o movimentu no sei halibur malu iha fatin públiku balun.

Ba kestaun ne'e, Komandante Jeral PNTL Komisariu Faustino da Costa hatete, Prezidente Repúblika dekreta ona estadu emerjensia, tan ne'e husu ba Timor-oan tomak teritoriu nasionál atu tuur hakmatek iha uma.

Komisariu Faustino dehan, PNTL sei hein hela diretiva husi governu hodi bele asegura implementasaun estadu emerjensia.

"Bainhira governu hasai diretiva ka orientasaun ruma mak Komandu (PNTL) sei koloka automatikamente atu asume responsabilidade hodi mantein seguransa no estabilidade," deklara nia iha Kuartel Jeral PNTL Kaikoli, Dili (27/03).

Tan ne'e, Komisariu Faustino apela ba komunidade sira atu tenke kumpri desizaun hotu-hotu hodi tuur hakmatek iha uma.

“Atu evita labele mosu violasaun direitus umanus iha estadu emerjénsia ita husu ba komunidade sira hotu tenke kumpre, tuur hakmatek," dehan Faustino.

Entretantu, daudauk ne'e Konsellu Ministru sei diskuti hela kona-ba regras ba estadu emerjensia.