Hafoin presta desklarasaun iha Departamentu Investigasaun Kriminal-PNTL, Eis Jornalista Alexandrino dos Santos hateten prezensa iha edifisiu Kuartel jerál Polísia Nasionál Timor-Leste (PNTL) iha Departamentu Investigasaun Kriminál Nasionál (DIKN) nia fatin hodi klarifika video tiktok ne'ebé viral iha media sosial kona-ba tuda aviaun.
"Ohin ha'u mai iha PNTL nia fatin hodi klarifika video ne'ebé ha'u tau iha tiktok konaba video ida tuda aviaun viral iha media sosial, sira deskonfia ha'u mak tuda, maibe ida ne'e ha'u mak halo editing duni hanesan tuda tebes," dehan nia ba jornalista sira, iha Edifisiu Departamentu Investigasaun Kriminál Nasionál, Kuartel Jerál PNTL, Kaikoli, Dili, Kinta ne’e (18/08).
Nia klarifika, video tiktok tuda aviaun ne'e nia rasik mak halo duni prosesu editing iha loron 16/07 foin lalais ne'e no públika iha tiktok la to'o oras 24, viral ona iha media sosial.
"Ha'u rekuñese aan katak, video ida kona-ba tuda aviaun ne'e ha'u mak halo editing duni, maibé laiha intensaun aat, ha'u hakarak aumenta ha'u nia kuñesimentu konten kreator utiliza prataforma tiktok, tanba ha'u laiha intensaun aat atu tuda aviaun, agora ha'u mai kopera ho polísia prontu atu hamos video ne'e iha tiktok," infroma nia.
Tanba ne'e nia parte, kopera ho Autoridade Seguransa hodi no nia promote ba oin sei la halo tan video konten kreator ne'ebé la eduka publiku no prosesu kazu ida ne'e, bainhira Ministeriu Públiku notifika prontu kopera ho Justisa.
"Ha'u sei hapus video tiktok tuda aviaun ne'e iha ha'u nia konten kreator tiktok no ha'u prontu kopera ha'u husu deskulpa ba públiku, ba oin sei la halo tan video hanesan ne'e, tanba kazu ida ne'e ha'u prontu kopera ho Autoridade judisiariu iha Timor-Leste," hakotu nia.
Iha fatin hanesan Diretór Media One-Timor Suzana Cardozo informa, video tiktok tuda aviaun viral iha media sosial ne'e laiha relasaun ho produtu jornalistiku, tanba nia rasik la halo ona servisu hanesan jornalista iha media One-Timor.
"Video tiktok tuda aviaun viral iha media sosial ne'e kolega Alex mak halo, maibe laiha ligasaun ho produtu jornalistiku, tanba nia sai ona husi media One-Timor fulan rua ona, tanba ne'e ha'u laiha kuñesimentu ba video ne'ebé mak kolega ne'e halo, agora nia hanesan eis jornalista," informa nia.
