Sekretáriu Jerál g7+, Helder da Costa atualiza ona preparasaun bá Primeiru-Ministru (PM), Kay Rala Xanana Gusmão no simu orientasaun hosi Xefe Governu nu’udár pessoa eminente bá g7+.
Sekretariu jeral g7+, Helder da Costa hatete, iha enkontru ne’e sira mós ko’alia ho Primeiru Ministru Kay-Rala Xanana Gusmão kona-bá planu atu realiza eventu nível altu, iha Nova Iorke iha Marjen-Asembleia Jeral Nasoes Unidas.
“g7+ sei organiza eventu altu nível iha Nova Iorke iha Marjen Assembleia Nasaun Unidas iha fulan-Setembru 2024. Primeiru-Ministru sei partisipa iha Sumit of the Future. Alende ne’e, partisipa iha semináriu ONU nian no eventu ne’ebé organiza iha biban ne’e,” Helder da Costa hateten hafoin atualiza bá Primeiru-Ministru iha Palásiu Governu, tersa (16/07/2024).
Helder hatutan, PM fó ona orientasaun bá g7+ hodi organiza eventu ne’e, tanba sei partisipa husi xefe estadu balun, xefe governu no ministru sira husi nasaun membru sira, hodi ko’alia kona-bá progresu no dezafiu ne’ebé g7+ enfrenta.
No tópiku ne’ebé sei ko’alia durante konferénsia internasionál ne’e maka, kona-bá pás bá nasaun membru g7+ no buka atu promove pás iha nível mundiál tanba Timor-Leste hanesan nasaun kiik ne’ebé hadomi pás.
Iha biban ne’e, Primeiru-Ministru Xanana Gusmão mós sei inaugura eskritóriu g7+ ne’ebé harii iha Nova Iorke.
Durante vizita Sua Santidade Papa Francisco iha Timor-Leste (TL), Primeiru-Ministru sei disemina nafatin knaar Timor-Leste nian iha nível internasionál hodi promove pás no rekonsiliasaun bá rai seluk.
Enkuantu, Nasaun sira ne’ebé sai membru g7+ mak hanesan, Repúblika Izlámika Afghanistaun, Repúblika Burundi, Repúblika Sentrál Afrika, Repúblika Chad, Uniaun Comoros, Repúblika Cote d’Ivoire, Repúblika Demokrátika Congo, Repúblika Guinee, Repúblika Guinea-Bissau, Repúblika Haiti, Repúblika Liberia, Papua Nova Guinea, Sao Tome e Principe, Repúblika Sierra Leone, Solomon Islands, Repúblika Federál Somalia, Republika Sudaun Súl, Repúblika Demokrátika Timor-Leste, Repúblika Togolese no Repúblika Yemen.