Embaixadór Kimura ne’e hatete, bolseiru na’in 18 ne'ebé ba estuda iha Japaun espera bele adopta teknolojia avansadu ne'ebé iha hodi bele mai aplika iha TL bainhira remata sira-nia estudu.

"Ha'u enkoraza no kontente tebes bainhira ha'u rona estetmentu husi sira, tantu mestratu no doutoramentu durante durasaun tempu ne'ebé desididu ona,ha'u espera katak sira bele aprende teknolojia avansadu iha japan nian no mós bele fó kontribuisaun mai iha país (TL) ida ne'e" dehan nia ba jornalista sira iha salaun Embaixada Japaun Palapasu, Kuarta (17/07).

Nia dehan, tanba kada bolseiru sira tempu estudu ne'ebé iha limitadu tebes, no balun tinan rua no balun tinan tolu, tanba ida ne'e mak sira tenke esforsu maka’as atu bele kompleta sira-nia estudu durante tempu ne'ebé deside ona.

Tanba ne'e, Embaixadór Japan espera katak bolseiru sira bele kompleta sira-nia meta estudu durante tempu ne'ebé iha, maibé hein katak durante tinan rua-tolu sira bele remata duni sira-nia estudu.

"Ha'u konvensidu tebes katak resepiente hotu-hotu sei kompleta sira-nia estudu tuir tempu ne'ebé determina tanba tinan ida ne'e ami-nia bolseiru sira hamutuk na’in 18 ne'ebé ba halao sira-nia estudu pós-graduadu nian, na’in tolu ba doutoramentu no na’in 15 ba mestradu" dehan nia.

Husi bolseiru na’in 18 ne'e bolsa estudu iha tipu tolu mak hanesan; JDS hamutuk na’in 8, JICA ni’an na’in 7 no Meks na’in 3 no finansiamentu ba bolseiru sira Embaixada Japan mak finansia.

"Ha'u sente katak númeru ne'ebé iha ne'e signifikadu tebes no númeru ne'e boot ha'u espera katak sira bele kontribui ba dezenvolvimentu TL nian iha futuru, no sei laiha estensaun tempu periodu ne'ebé mak fó ona ba sira" dehan nia.

Diretór Jerál INAP, Policarpo Amilcar Boavida hatete, Japan ho INAP sai parseiru di'ak bainbira iha ona bolsa estudu sempre fahe ba instituisaun estadu nian atu bele konkore.

Governu Japan sai parseiru di'ak ho TL ne'ebé sempre investe maka’as ba rekursu umanu hodi ba kontinu estudu iha Japan hasa’e mestradu no doutoramentu para bele fali mai TL hodi ajuda dezenvolve TL.

"ohin ita-boot sira haree bolseiru sira mai ho ministériu oi-oin tanba gradu estudu la hanesan tanba JDS ho JICA nian ne'e fó prioridade ba funsionáriu públiku maibé la taka dalan ba timoroan sira ne'ebé hakarak iha bolsa estudu ne'e rasik" dehan nia.

Maibé entre tipu tolu ne'e japan nia parseiru mak JICA ho JDS maibé ba iha Meks nian ne'e bolsa estudu jerál ne'ebé sidadaun hotu bele konkore maibé haree hotu ba idade maibé ba JDS ho JICA nian ne'e Japaun oferese barak liu mak profesór UNTL nian.

Entretantu bolseiru na’in 18 ne'e mai ho direferente instituisaun estadu nian tanba balun husi profesor UNTL, balun husi Ministeriu finansas, HNGV, PN, no mós sira seluk tan ne'ebé mak hala’o estudu iha Japaun.