Enkuantu, suku lima ne’ebé iha Munisipiu Atauru mak hanesan, Suku Beloi, Makadadi, Vila-Maumeta, Biqueli no Makili.

Repzentante Sekretaria Ezekutiva PNDS, Diretór Administrasaun no Finansas, Bartolomeu Dias Tilman, hatete, total zinko ne’ebé distribui ba iha suku lima ne’ebé lokaliza iha Munisipiu Atauru hamutuk tahan 17.993.

Nia dehan, distribuisaun kalen zinko ne’e, kada suku ida iha benifisiariu na’in 37.

Tuir nia, ba kada zinko ho folin dollar amerikanu $23, 50 centavus.   

“Ba benifisiariu ne’ebé simu ona kalen ne’e labele rai deit, ita fó tempu fulan ida, hakarak ka lakohi sira tenki taka ona kalen ne’e, labele rai kleur no kuidadu. Mesmu orsamentu ne’e estadu nian maibé ita tenki simu ho kuidadu,”dehan nia ba Online INDEPENDENTE, iha Aldeia Pala, Suku Biqueli, Munisipiu Atauro, kinta ne’e (16/03).  

Tan ne’e, Nia husu ba benifisiariu sira atu labele fiar lia falsu sira ne’ebé dehan, orsamentu ne’ebé konstrui ba Uma Naroman ba Povu ne’e mai husi doadores ka husi rai liur, maibé ne’e orsamentu Jeral Estadu.

“Atu dehan katak, programa UNP ne’e mai husi Orsamentu Jeral Estadu,”dehan nia.

Iha fatin hanesan, Administradór Munisipiu Atauro, Domingos Soares, hatete, distribuisaun kalen zinko ne’e ba komunidade ne’ebé ninia kalen feruzen hotu ona.

Administradór ne’e husu ba benifisiariu sira atu utiliza kalen sira ne’e ho didiak.

“Ha’u husu deit buat rua, labele simu deit maibé bele mós kontribui. Kontribui mak liu husi ita nia forsa,”dehan nia.

Entretantu, Xefe Suku Biqeli, Daniel Martins hatete, iha tinan 2021, Suku Biqueli, Aldeia Likinamu mak hetan UNP regular.  

“Iha tinan 2021 to’o 2022 ita mós rehabilita sede suku. Ami agradese tanba ho fundus ne’ebé Governu liu husi Ministeriu Administrasaun Estatal apoiu, bele dehan katak dezenvolvimentu ne’e direita ba komunidade,”dehan Xefe Suku Biqueli.

Nia hatutan, iha tinan 2022 iha suku refere, komunidade uma-kain 37 mak sai benifisiariu ba UNP + B.

Enkuantu, reprezentante Benifisiariu Luis da Costa, hato’o agradese no orgullu ba Oitavu Governu Konstituisional ne’ebé bele apoiu ona sira liu husi programa PNDS nian ba distribuisaun zinko refere.

“Ami senti orgullu tanba apoiu ida ne’e natoon ona mai ami,”hakotu nia.