Diretór Administrasaun no Finansas, Bartolomeu Dias Tilman, hatete, rehabilitasaun ba rezidénsia profesores ne’e iha sala rua, kuartu lima ne’ebé kompleta ho nia fasilidade sira hanesan, eletrisidade, bee moos, sasan dapur nian, kulsaun, armari, haris fatin no mós buat seluk tan, ho nia orsamentu hamutuk dolar amerikanu rihun $31.500.

Fatin refere akumula profesores hamutuk na’in lima kompostu husi professor na’in haat no profesora na’in ida.

“Korserteza uma ne’e, ita konstrui entrega ona ba sira (profesores) hela permanente, atu nune’e sira bele besik eskola hodi hanorin ho diak,”dehan nia ba Online INDEPENDENTE, iha Rezidénsia Profesores, iha Aldeia Pala, Suku Biqueli, Munisipiu Atauru, kinta (16/03).

Nia hatutan, tanba durante ne’e profesores sira balun hela dook, ezemplu professor balun husi Suku Makadadi, entaun sira mai tarde, sira fó asistensia ladun maximu,

Tanba ne’e, liu husi programa PNDS nian bele fasilita ona fatin seguru ba profesores sira.

Iha fatin hanesan, Felizarda Lurdes, agradese ba Oitavu Governu liu husi Programa Nasional Dezenvolvimentu Suku ne’ebé fasilita ona fatin seguru ba sira hodi hela.

Entretantu, Administradór Munisipiu Atauru, Domingos Soares, hatete, tuir lolos Ministru MAE mak atu halo inaugurasaun ba fatin rezidénsia profesores nian, maibé tanba servisu lubuk ida ne’ebé Ministru sei halo, nune’e, Sekretaria Tekniku PNDS hamutuk ho Autoridade Munisipál mak halo inaugurasaun ba fatin refere.