Prezidente Komisaun G ne'ebe trata asunto Edukasaun iha Parlamentu Nasional, Deputadu Antonio Verdial hatete, nia parte tristi hare estudante finalista sira hatudu hahalok ne'ebé bandalizmu, tanba nee nia husu ba Ministeriu Juventude no Desportu (MEJD) atu haree ba kestaun nee, nunee bele trata asuntu edukasaun ho digno.
"Ha'u hare iha video ne'ebé viral iha media sosial komportamentu no responsavel husi estudante finalista sira husi Ensino Sekundáriu Jerál ne'ebé hatudu atetude ladiak hodi pinta fali sira nia farda ho dezeñu ne'ebé ladiak. Hanesan prezidente Komisaun G trata asuntu Edukasaun sente triti tebes hare video ne'e, nune'e ho hara'ik aan husu Ministeriu Edukasaun Joventude no Desportu atu kria resolusaun ida hodi nune'e bele fó sansaun ba estudante ne'ebé hatudu hahalok bandalismu ne'e,”dehan nia iha plenaria Parlamentu Nasional, segunda horseik (24/01).
Tuir nia, hahalok ida hanesan nee kada tinan estudante finalista sira sempre hatudu, tanba nee husu ba MEJD tenki tau atensaun.
Ho nunee, nia husu ba Ministeriu Edukasaun no manorin na’in sira atu identifika estudante hirak neebé halo asan bandalizmu nee, nunee bele fó atensaun ba sira.
Entretantu, Ministeriu Edukasaun Juventude no Desportu (MEJD), anunsia rezultadu ezame nasional iha loron 20 fulan-Janeiru 2022.
Enkuantu, total estudante finalista tinan 2021 iha Timor laran tomak, kompostu husi Ensino Báziku too Ensino Sekundária Jeral hamutuk 58.224, husi númeru ne’e na’in 18 mak la pasa iha ezame nasional.
Asistente Editor: Saturnina da Costa
