"Ha'u husu ba governu no estadu hodi asegura eleisaun presidensiál ne'ebé ho inklusivu no asisivel ba Ema Ho Defisiensia iha timor laran tomak,"dehan nia ba Online INDEPENDENTE iha nia knaar ADTL Maskarinhas, segunda(24/01).
Nia dehan, liu-liu Ema Ho Defisiensia Matan iha timor laran tomak. ADTL mós sei fasilita ema difesiensia matan sira ne'ebé presiza advokasia iha bulletin ba letra braille iha eleisaun presidensiál tinan 2022.
Iha tinan ida ne'e STAE no CNE seidauk iha makina bolletin votus ba letra braille.
"Nune'e ami espera katak tinan oin mai, ba eleisaun parlamentar bele asegura ho ida ne'e, ami nia servisu ne'e organizasaun ADTL komesa ona atu fasilita Ema Ho Defisiensia Matan sira ba letra braille ba prosesu ida ne'e," nia informa.
Tuir dadus sensus tinan 2015, total Ema Ho Defisiensia iha TL hamutuk rihun 38.118. Husi númeru ne’e, asesu ba letra braille foin pursentu 5 (5%).
Diretór ne’e informa katak, bainhira ema ho defisiensia atu tuir eleisaun presidensiál, ema tenki akompaña sira to’o iha fatin bulletin votus, tanba ema ho defisiensia seidauk independente lolos. Sira nia votus seidauk bele segredu tenki liu husi ema seluk mak ba vota.