Prezidente Komisaun G ne’ebé trata asunto edukasaun, Antonio Verdial hatete, komisaun G hakarak fó solusaun ba Ministériu Edukasaun atu kria rezolusaun ka regulamentu ruma hodi bele fó sansaun ba estudante finalista sira ne'ebé pinta farda.
"Ha'u fó solusaun mak ministériu tenke kria rezolusaun ida ba estudante finalista sira iha territóriu tomak atu labele hatudu hahalok bandalizmu no imoral, iha rezolusaun ne’e tenke tau mós sansaun ba estudante sira,”dehan nia iha plenaria Parlamentu Nasionsal, segunda ne’e (24/01).
Tanba ne’e, nia parte senti triste tebes ho hahalok estudante sira ne’ebé pinta atributu eskola nian.
“Sente triste no haree estudante finalista sira balun pinta fali farda hatudu hahalok bandalizmu, tan ne’e husu MEJD atu servisu hamutuk ho responsavel eskolár no manorin sira iha territóriu tomak atu trata asuntu ne’e ho didi’ak, nune’e bele hamosu edukasaun ne’ebé ho dignu,” tenik nia.
Nia hatutan, haree ba situasaun ne’e, kada tinan sempre akontese, bainhira estudante finalista sira rona rezultadu ezame nasional nian.
Nune'e, Prezidente Komisaun G, husu ba Ministeriu Edukasaun Juventude no Desportu atu tau atensaun ba estudante finalista sira, atu labele halo tan hahalok ne’e, tanba edukasaun mak xave ba dezenvolvimentu, ho ida ne'e, Parlamentu Nasional fó apoiu polítiku tomak ba MEJD atu trata asuntu ne’e ho digno.
Entretantu, Ministeriu Edukasaun Juventude no Desportu (MEJD), anunsia rezultadu ezame nasional iha loron 20 fulan-Janeiru 2022.
Enkuantu, total estudante finalista tinan 2021 iha Timor laran tomak, kompostu husi Ensino Báziku too Ensino Sekundária Jeral hamutuk 58.224, husi númeru ne’e na’in 18 mak la pasa iha ezame nasional.
Asistente Editor: Saturnina da Costa
