Prezidente Komisaun F ne’ebé asuntu Saúde, Seguransa Sosiál no Igualidade Jéneru, Noé da Silva Ximenes hatete, Governu persija foti asaun lalais hodi halo  prevensaun tanba numeru moras dengue aumenta ba bebeik.

 "Iha semana kotuk hala’o fiskalizasaun ba ospitál nota katak, moras dengue maka'as duni, nune’e saida mak ita halo hodi bele solusiona tenke intensifika asaun no prevensaun ho lais ka urjente tanba afeta ba sidadaun nia moris", dehan nia liu husi Plenaria Parlamentu Nasional segunda nee (24/01).

Nia hatutan, Governu persija foti asaun lalais liu- tan hodi halo prevensaun ba moras dengue tanba iha problema kapasidade atu akumula moras sira iha óspital ne'ebé tama ho kapasidade bo'ot. Enkuantu, iha ona alokasaun pasiente moras dengue iha HNGV ba sentru izolamentu Vera Crus ne’ebé hetan tratamentu ho di’ak.

“Ita hatene kazu moras dengue aumenta seidauk to'o fulan ida sa'e maka'as tebes, seidauk ba to’o fulan rua ne'e susar tebes. Ha'u nia preokupasaun importante ba situasaun labarik sira ne'ebé hetan moras dengue, ne'ebé agora numeru sa'e maka'as hodi rezulta ema lakon vida, ita seidauk halo kompleta fulan ida iha janeiru nian, maibé  ita lakon ona vida hamutuk na'in 16," dehan Deputada husi Partido Demokratiku iha Parlamentu Nasional, Elvina Souza.  

Nia hatutan, agora dadaun ema na’in 713 mak infetadu ona ba dengue, ida ne'e seriu no grave tebes.

“Hare ba Situasaun ida ne'e ha'u hanoin katak Parlamentu Nasional liu husi Komisaun F ne'ebe trata asunto saude atu bolu ministra saude mai Parlamentu Nasional hodi bele esplika hamutuk ho ita hotu buka solusaun ba moras dengue", nia esplika,

Enkuantu Deputadu Gabriel soares hateten, moras dengue la'os hare de'it iha media sosial, maibé iha tempu ruma ita hakat ba Hospital Nasional Guido Valadares (HNGV) hodi hare labarik sira moras ne'e difikuldade tebes.

"Difisil tebes labarik, ita nia oan sira moras dengue ne'e, balun la hetan kama para atu baixa sira tur de'it iha kadeira no balun ba tau fali iha uma tatis, ida ne'e Ministra Saúde tenke tau atensaun", nia subliña.

Nia informa, bainhira iha tempu udan moras dengue ho numeru sa'e maka'as tebes, tanba ne'e husu Governu servisu ho seriu hodi atende ba moras refere. Tamba tuir informasaun labarik na'in 16 mak mate ho moras dengue, ida ne'e mak governu la tau atensaun ne'e susar tebes.

Asistente Editor: Saturnina da Costa