Iha enkontru refere, mosu hanoin atu harii edifisiu foun no uma ba deputadu sira iha area Hera, Postu Administrativu Kristu Rei, Munisipiu Dili. Rai ne’ebé PN sei okupa kuaze ektare 10.
Maske konsege mosu pro no kontra ba planu ida ne’e, maibé ikus mai PN deside duni hodi avansa.
Vise Prezidente Parlamentu Nasionál, Maria Angelina Sarmento hatete, husi total orsamentu privativu PN tokon $16, sei aloka tokon $3 nu’udar kustu ba harii edifisiu foun.
“Millaun $16 ne’e inklui mós milaun $3 kustu atu harii edifisiu Parlamentu Nasionál, ne’ebé ida ne’e preve de’it orsamentu Parlamentu Nasionál nian,” dehan Angelina hafoin reuniaun lider Bankada, iha PN, Segunda (28/09).
Bainhira OJE 2021 aprova, orsamentu tokon $3 atu harii edifisiu PN sei transfere ba fundu infra-estrutura, nune’e sira bele jere ba konstrusaun edifisiu refere.
“Ne’ebé montante orsamentu (ba PN) ne’e sa’e, tanba pur kauza Parlamentu Nasionál planeia tau orsamentu hodi harii nia edifisiu iha ano fiscal 2021 ninian, hahú ho montante milaun $3,” dehan nia.
Nia dehan, tokon $3 ne’e hanesan faze inisiu de’it ne’ebé loloos aloka ba dezeñu ba edifisiu PN.
Maibé tanba dezeñu ne’e iha ona, nia dehan, osan refere sei utuliza hodi hahú prosesu konstrusaun.
“To’o agora dezeñu ba edifisiu Parlamentu Nasionál iha ona, hahú kedas iha Primeira lejislatura no segunda lezislatura,” dehan nia.
Kona-ba atu harii mós rezidénsia ba deputadu sira, nia parte la hatene, tanba iha dezeñu ne’ebé agora dadaun iha la preve ba rezidénsia ba deputadu sira.
Entretantu, iha 13 Agostu liu ba, Prezidente Parlamentu Nasionál Aniceto Guterres realiza enkontru ho Ministru Justisa Manuel Carceres hodi koalia kona-ba rai ba PN atu harii edifisiu foun no uma ba deputadu sira.
“Ita-hotu hatene kondisaun Parlamentu Nasionál la dignidade ona ba ita-nia na’i deputadu sira atu halo serbisu hanesan órgaun soberania ida, tanba ne’e presiza nesesidade atu harii edifísiu ida ba Parlamentu Nasionál no rezidénsia ba deputadu sira,” dehan Ministru Carceres hafoin enkontru ho Prezidente PN.
Tuir vizaun Prezidente PN, Ministru Carceres dehan, rezidénsia deputadu sira no edifísiu parlamentu nian pakote ida de’it atu bele akumula serbisu hotu.
“Señor Prezidente Parlamentu aprezenta nia vizaun oinsá mak atu harii edfísiu Parlamentu Nasionál nian, fatin par funsionariu sira halo serbisu, fatin ba deputadu idaidak no rezidénsia ba na’i deputadu sira,” dehan nia.
Nia hatutan, atu konstrui edifísiu foun Parlamentu Nasionál no rezidensia ba deputadu sira, presiza fatin ne’ebé ke luan, entaun Dili laran labele ona.
Ministru ne’e hatutan, nia sei fó orientasaun ba Diresaun Nasionál Serbisu Kadastrál atu buka rai estadu nian iha Hera hodi sukat, hafoin aprezenta ba Prezidente PN.
“Ita tenke ser sees an husi Dili, sei ba buka fatin iha Hera, tanba iha ne’ebá rai estadu barak maizumenus hektares 10 par depois atribui ba Parlamentu Nasionál no Parlamentu Nasionál hanoin hahú halo konstrusaun ba edifísiu ho fasilidade tomak inklui rezidénsia ba deputadu sira,” dehan Caraceres.
Iha fatin hanesan, Sekretária Jerál PN, Cedelizia Faria dos Santos hatete, daudauk ne’e foin hahú prosesu buka rai, no PN sei prevé osan iha Orsamentu Jeral Estadu 2021 hodi halo dezeñu no estudu.
“Bazeia enkontru ohin ne’e, pozitivu iha Hera, maizumenus ektare 10 hodi oferese ba parlamentu, ninia inisiu orsamentu ne’e sei tau iha orsamentu 2021 hodi halo dezeñu no estudu. Ami-nia planu ne’e 2022 ne’e bele ona tau primeira pedra ba edifísiu parlamentu nian. Orsamentu dezeñu nian ami seidauk hatene mas entre $500 mill até millaun $1,” dehan nia.
Nia hatutan, uluk PN planeia atu harii edifisiu iha kapital Dili, maibé Prezidente PN atual iha vizaun ketak katak sei iha mós rezidénsia ba deputadus sira no kada deputadu tenke iha nia eskritóriu.
