Prezidente Bankada Partidu Demokrátiku, António da Conceicao hateten, lixu ne’e governu presiza iha politika ida loloos kona-ba rekolla lixu ne’e.

“Governu anterior ko’alia kona-ba Portugal atu ajuda oin nusa mak atu halo tratamentu lixu, agora ita ko’alia fila-fali kompana sira boot-boot balun mai halo promesa tinan-sanolu ona, kuandu ita temi beibeik Pelican Paradise, hau hanesan alerjiku oituan, tanba asume promesa depois fo nafatin empena ita Timor nia prosesu dezenvolvimentu atraza, tanba promesa ne’ebe iha,” dehan nia, iha Parlamentu Nasionál, horisehik.

Nia haktuir, Governu tenke iha konsistensia ida atu haree se ema sira ne’e laiha iha kbiit atu ]hala’o dezenvolvimentu hapara, fó fali ba ema seluk, tanba ema ne’ebé mak hakarak mai investe iha timor ne’e barak hela.

“La’os ida ne’e deit, depois ita nafatin asegura, ida ne’e mak hau mos rona, sira mos atu halo tratamentu lixu,” nia relata.

Prezidente Bankada Frente Mudansa, Isabel Ximenes, preokupa lixu iha komoro nian ne’e loroloro lixu nakonu tebetebes.

“Kuandu mais ida agora ne’e merkadu urjente iha komoro ne’e,  lor-loron nakonu teb-tebes,  depois sira fahe malu iha tuku 9:00 kalan, lixu  nakonu iha area ne’ebá liu-liu, parte ida ne’ebé mak iha sentru saúde Komoro nia oin kedan,” nia kestiona.

Deputada Bankada CNRT, Veneranda Lemos Martins, preokupa problema lixu nunka mais resolve iha Dili laran.

“Hanesan  mos iha Bairo balun ne’ebé mak ita tama vizinu balun hakiak  fahi iha kedas uma sorin-sorin, to’o tempu udan, kain fresku fahi ninian ne’e afeta ba familia sira seluk, ida ne’e ita ko’alia hakiak fahi iha areadores uma ninian ne’e kleur ona,” nia relata.

Nia haktuir, maibé governu laiha kapasidade atu halo kontrolu ba kestaun ida ne’e no  Prezidente autoridade Dili ninian  tenke tau atensaun, maibé la hatene Ministru Administrasaun Estatal no Vise Ministru toda dukur, haree loos nia sabatu  tutun.

“Maibé la haree dook katak sidade hanesan espellu ba liur, maibé nusa mak ita labele haree ba asuntu ida ne’e,” nia preokupa.

Nia fundamenta, iha Igreja katedral bainhira ba misa domingu-domingu husi parte mai tasi ninian, atu mate deit, iis maka’as teb-tebes, vizinu sira besik katedral ne’ebá karik mós hakiak fahi iha ne’ebá, ida ne’e triste la halimar.

“Ita semana-semanan ko’alia beibeik tanba  deit lixu  no tanba deit hakiak fahi iha uma sorin-sorin, hau fiar katak iha regras husi  Ministériu Estatal ninian ka Autoridade Dili ninian mos iha regras ida ne’e, tanbasa la implementa,” nia informa

Nia lembra muitu bem iha governasaun anterior  iha ona dekretu-lei ida ke regula atu foti lixu, kalan ema so’e lixu iha nia fatin, dadersan kompana sira  ba foti lixu dadersan tuku 6 balun  no tuku 9:00 hanesan ne’e lixu iha fatin-fatin mos hotu ona.

 “Maibé infelizmente ida ne’e ita la kontinua, problema  iha ne’ebé, hamos deit dili laran problema iha ne’ebé,” nia preokupa.