Diretór Ezekutivu Luta Hamutuk (LH), José Alves da Costa hatete, folin sasán nesésidade báziku iha merkadu agora dadauk sa’e makas, maibé husi parte governu rasik la hatene oinsá atu kontrolla, sira regula tiha lei mais ninia konsekuensia sira la antisipa.
Nia dehan, hanesan Ministru Finansas ko'alia daudauk lei ne'e aplika ba iha item tolu ka hat maibé kuaze iha merkadu ne'e sasán hotu-hotu nia folin sa'e hanesan hotu-hotu taxa ne'e kona frakeza ida ne'ebé ita haree.
Nia hatete, la tau lable ruma katak sasán ida ne'e produsaun foun no foin tama kona ona taxa tanba ne'e mak nia folin sa'e, agora sasán anteriór sira ne'ebé iha ne'e mak folin sa'e fali ida ne'e loloos violasaun ida ba direitu konsumidór ne'e manipulasaun hanesan susuk karik supa ema nia ran ho ida ne'e presija hamate.
Nia esplika, semana kotuk AIFAESA tun halo inspesaun maibé AIFAESA rasik la fó ketegasan ba kompañia sira ne'ebé halimar folin loloos ne'e sira mak tenke tegas.
Nia haktuir, sira dala ruma hanoin katak sei iha kbiit atu hola, se mak hakarak hola ne'e hola, la hola mós la buat ida, dala ruma sira la interese ona povu ida ne'e.
"Ha'u hanoin Parlamentu Nasionál tenke toma atensaun ba ida ne'e tanba sai matan tilun, fuan ibun povu nian tenke sai duni matan tilun fuan, ibun, labele matan tilun ba sira nia osan de'it, ba sira nia interese de'it. Ha'u hanoin governu tenke foti medida ida ne'ebé rigór di'ak liu backlist kompañia atu boot halo nusa iha Timor mós bainhira nia halo manipulasaun ba folin sasán, atu estraga ninia povu ida ne'e fó backlist ba sira no multa mós boot kedas atu hahalok ne'e ita tenke hamate," dehan Diretór Ezekutivu Luta Hamutuk José Alves da Costa ba jornalista jornál INDEPENDENTE iha nia kna'ar fatin Faról, (16/1).
Iha fatin ketak, Peskizadór AJAR, Inocencio de Jesus hatete, governu deside taxa ne'e fó implikasaun ba kapasidade kompras, uluk ita nia avo sira kontra kolonializmu Portugés tanba impostu. Maibé, agora se mak loron-loron hemu bebidas asukar ne'ebé presija hare. AJAR aseita hasa'e taxa, maibé governu tenke loke kampu traballu mak ema iha kapasidade atu selu taxa.
Nia esplika, folin merkadu ne'e faan na'in sira, maibé Governu asegura atu laiha manipulasaun maibé defaktu governu, AIFAESA lakon nia kapasidade tanba ohin loron sasán hahú folin sa'e iha merkadu.
"Ami husu AIFAESA mós tau matan ba sasán ne'ebé folin sa'e iha merkadu nune'e distributor sira labele halo manipulasaun ba presu. Ministru, deputadu sira labele ko'alia taxa ne'e bazea ba sira nia karteira, no rendimentu tenke bazea ba populasaun Timor ninia nesésidade," haktuir nia.
