Tanba ne’e, tuir planu sei debate urjente ho Ministra Saúde ho entidade relevante sira iha Parlamentu Nasional hodi rona planu ba prevensaun moras dengue husi Ministra Saúde.
Tuir Prezidente Parlamentu Nasional, Aniceto Longuinhos Guterres, hatete, objetivu visita pasiente moras dengue iha óspital refere, hodi fó korajen ba pasiente sira atu bele rekupera lalais husi moras nee.
Tanba nee, nia dehan, deputadu sira iha Parlamentu Nasional akompaña situasaun dengue ne’ebé kada loron rejista ho númeru aas no hamate ona labarik na’in 16.
Nunee, nia hatutan, bainhira ema ida laiha konsensia atu halo prevensaun mak moras nee sei aumenta liu tan.
"Ami mai visita hodi verifika de'it situasaun moras dengue ninia gravidade ne'e halo nusa, ida nee hanesan preparasaun ida ba ami atu hala’o debate urjente iha seguda-feira, tanba ne'e Parlamentu hakarak rona Ministra Saúde kona-ba moras dengue neebé kada loron nia númeru aas, atu bele halo prevensaun", dehan nia iha HNGV, tersa nee (25/01).
Tuir nia, Estadu liu-liu Governu presija tau atensaun no halo prevensaun ba moras dengue neebé hamate ona ema barak.
Entretantu, tuir dadus husi Ministeriu Saúde liuhusi Diresaun Nasional Saúde Públika, Departamentu Vijilánsia Epidemolojia, relata to’o loron 24 fulan-Janeiru 2022, kazu dengue hamutuk 835, husi númeru nee na’in 16 mak lakon vida.
Asistente Editor: Saturnina da Costa
