Diretór ezekutivu Forum Organizasaun Naun Governamental Timor Leste (FONGTIL) Daniel dos Santos Carmo konsidera Parlamentu Nasionál koko halimar oportunista iha situasaun ida ne’e.
“PN koko atu halimar oportunista iha situasaun ida ne’e, sira ko’alia dehan redus orsamentu maibé sira lakohi redus sira nia orsamentu signifika ninia lojika maka ne’e osan ne’ebé ba halo dezenvolvimentu sira haruka hatun PN nia osan ne’e tau hodi halo saida, tau hodi halo fiskalizasaun ba governu nia servisu,” dehan diretór ezekutivu FONGTIL Daniel dos Santos ba Jornál INDEPEDENTE iha nia kna’ar fatin, Kaikoli, Tersa (07/01).
Nia dehan se osan ba dezenvolvimentu laiha PN atu ba fiskaliza saida ne’ebé sira nia osan ne’e barak liu ne’e ba sira nia perdiam ba viajen sira lokal no internasionál, viajen lokal ne’e ba ne’ebé hodi ba haree projeitu haree servisu sira governu halo ne’e. Maibé osan ba halo servisu sira ne’e sira dehan haruka hatun depois sira ba atu haree saida ne’ebé povu TL tenke matan moos ho modelu reperezentante sira hanesan ne’e.
“Sira ninia ibun ne’e ko’alia kona-ba sira reprezenta povu maibé sira nia hahalok ne’e la hatudu sira reprezenta povu maibé sira nia hahalok ne’e defende sira nia poder goza preveleju hanesan deputadu no haluha aan tiha povu ne’ebé hili sira,” hateten nia.
Tanba ne’e publiku tenke haree ona ema sira hanesan ne’e merese atu reperezenta ita ka la’e, tanba sira la halo polítika ida atu asegura povu nia interese asegura sira nia interese liu husi orsamentu ne’e, sira hakarak Ministériu sira tenke hatun maibé sira nian lakohi hatun sira hakarak aprova hodi hola prado, pajero hela 30 resin seidauk hola ne’e sira hakarak hola kompleitu atu sira sae mina ba kareta labele falta, manutensaun ba kareta labele falta, perdiam labele falta, osan ba sira han iha PN loron-loron labele falta ne’e maka sira defende.
Nune’e viajen ba estranjeiru labele falta ida ne’e, se maka atu halo dezenvolvimentu ne’e governu maibé osan ba governu sira haruka koa ida ne’e.
“PN sira hanesan oportunista ka buka di’ak de’it sira halo polítika atu asegura sira nia oportunista iha situasaun ida ne’e, sira hakarak di’ak de’it ne’e ema oportunista la’os reprezentante,” tenik nia.
