Vise-Prezidente Parlamentu Nasionál, Maria Angelina Sarmento hateten, kona-ba subsídiu US$ 200 ba uma-kain sira ne'ebé família vulneravél.
Nia dehan, iha primeiru Konsellu Ministru aprova subsídiu uma-kain $200 fin-du-anu ne'e atribui ba universál, maibé iha dekretu governu, depois artigu ida ko'alia universál, iha fali artigu ida ko'alia kona-ba subsídiu uma-kain ne'e só família sira-ne'ebé tama iha kategoria hanesan família karensiadu ka vulneravél mak iha direitu atu simu subsídiu ne'e.
Tanba ne'e, kuandu dekretu ne'e lori ba Prezidente Repúblika atu halo promulgasaun. Prezidente Repúblika la aseita ho artigu ida ne'ebé dehan subsídiu uma-kain ne'e aplika universál ba ema hotu-hotu.
Entaun, Prezidente Repúblika haruka fila-fali dekretu lei ne'e ba governu atu halo fali alterasaun, tanba Prezidente Repúblika mós la aseita atu subsídiu ne'e universal ba ema hotu-hotu.
"Maibé ema ne'ebé saláriu US$ 500 ba leten ne'e la tama kategoria hanesan família vulneravel atu sai mós benefisiariu ba subsídiu uma-kain ne'e," dehan Maria, iha Parlamentu Nasionál, horisehik.
Ho ida-ne'e mak governu halo tuir pedidu Prezidente Repúblika nian hodi altera tiha artigu ida-ne'ebé iha inisiu dehan universál hodi atribui de'it ba família mais karensiadus no vulneravel.
Nune'e, dekretu ne'e promulgadu ona nu-fin governu mós halo alterasaun bazeia ba buat ne'ebé mak Prezidente Repúblika husu.
Nia hatutan, entidade ne'ebé sei ezekuta distribuisaun subsídiu ne'e inisiu Dezembru mak Ministériu Solidariedade Sosiál no Inkluzaun (MSSI) ein-koperasaun Ministériu Admistrasaun Estatal (MAE) atu haree dadus dezakregadu familia vulneravel ne'ebé iha ona baze dadus.
"Ha'u hanoin governu iha eskalaun salariál ne'e iha sistema dadus iha. Aliende ida-ne'e tanba distribuisaun ne'e servisu Ministériu Administrasaun Estatal, autoridade lokál mós sei envolve.
Ha'u hanoin autoridade lokál hatene malu iha sira-nia aldeia no suku sé mak funsionáriu públiku ne'ebé saláriu US$ 500 ba leten no sé mak servisu iha ajénsia internasionál no ONG sira maizumenu nia saláriu nivél ne'e US$ 500 ba leten, ha'u hanoin sira hatene malu," tenik Maria.
Aliende dadus Ministériu Admistrasaun Estatal ne'ebé iha dezagregadu mas detallu sobre funsionáriu ne'ebé simu saláriu US$ 500 ba leten ne'ebé hanoin ladún iha problema.
"Aliende ida-ne'e ita mós iha entidades halo inspesaun no kontrolu nian hanesan Komisaun Anti Korrupsaun, sira mós halo monitorizasaun ba sistema sira-ne'ebé mak uluk ita atribui ona ba uma-kain iha 2020 bainhira ita hasoru Covid-19," katak nia.
Maria reforsa, subsídiu US$ 200 ne'ebé atribui ona uma-kain tinan hirak ba kotuk ne'e mós iha keixa ne'ebé ema aprezenta ba KAK ema sira ne'ebé simu saláriu US$ 500 ba leten mós simu.
Nune'e, keixa ba ministériu relevante hanesan MSSI ne'ebé hanoin sira iha dadus, totál familia Timor-Leste ne'ebé tama iha kategória mais karensiadus atu simu subsídiu US$ 200.
"Ne'ebé espera entidade ne'ebé hatene ka iha dadus sira mós bele hola papél ida pro-ativu atu komunika ka kondena ho Governu atu sira ne'ebé saláriu la priense kritériu US$ 500, sira retira sai benefisiariu ka voluntariamente, la presiza atu simu subsídiu US$ 200," dehan nia.
Molok ne'e, Prezidente Repúblika, José Ramos Horta, promulga ona alterasaun dahuluk ba Dekretu-Lei númeru 37/2022, kona-ba subsídiu “Fim do Ano” ho montante $200 ba ema vulnerável ka uma-kain ne’ebé ho rendimentu ki’ik liu $500 kada-fulan.
Governu deklara antes ne’e atu atribui subsídiu “fim do ano” ho montante $200 ba uma-kain hotu iha territóriu nasionál, maibé Xefe Estadu no sosiedade sivíl, la aseita no husu altera, nune’e governu halo alterasaun ba lejizlasaun ne’e hodi atribui de’it ba família sira ne’ebé ho rendimentu kiik.
"Hau kontente tebes tanba Governu rona Sosiedade Sivil sira, rona hau rasik atu fó deit subsídiu $200 ba familia sira ne’ebé hetan difikuldade ho rendimentu ne’ebé kada fulan menus hosi $500 mai kraik, $500 ba leten sei laiha direitu atu hetan," dehan Prezidente Repúblika, José Ramos Horta.
"Governu aseita ha’u nia opiniaun no parte hotu, nune’e loron tolu ba kotuk ha’u promulga ona Dekretu-Lei ne’ebé foin lalais Konsellu Ministru halo alterasaun no dadaun ne’e hein de’it Governu halo pagamentu ba uma-kain iha territóriu laran tomak," Nia haktuir.
