Tuir Deputada husi Partidu Frente Mudansa, Isabel Freitas Ximenes, hatete, bainhira haree iha viziñu, iha labarik balun mate liu ona loron 31 mak hafoin parte saúde ba halo fumigasaun. Ida nee hanesan failansu ida ba Ministeriu Saúde.

" Ita hare de'it dengue ninia periodu loron sanulu laiha asaun ruma halo, nune'e oinsa mak kazu labele sa'e maka'as, ida ne'e realidade laiha prevensaun efeitu, tanba ne'e husu Ministeriu Saúde atu intensifika fumigasaun ne'e persija halo iha teritoriu nasional," dehan Deputada Isabel Feritas Ximenes, iha Parlamentu Nasional, segunda horseik (31/01).

Enkuantu, Prezidente Grupu Mulher Parlamentar Timor-Leste (GMPTL) Lidia Norberta, hateten, tuir observasaun husi grupo refere ba iha Óspital Nasional Guido Valadares, Sentru Saúde Farmoza no Vera Krus hatudu, moras dengue afeta ba populasaun no maioria ba labrik sira.

"Ha'u husu atu parte Ministeriu Saúde bele halo prevensaun ho fumigasaun ba iha bairu sira, hodi fornese muskiteriu ba populasaun sira", nia dehan.

Tanba nee, nia rekomenda mós ba autoridade lokál no komunidade sira atu servisu hamutuk hodi kontribui hala’o limpeza jeral iha kada bairu no uma rasik, nunee bele evita moras dengue.

Aleinde, Deputada nee mós rekomenda ba Ministeriu Saúde atu presiza aumenta ekipamentus sira hanesan, oksijeniu, ventilador, kama no mós ekipamentus mediku sira seluk, iha Sentru Saúde no Óspital sira.

Ho nunee, bele fó atendementu neebé adekuadu ba pasiente sira.

Entretantu, tuir dadus husi Ministeriu Saúde liu husi Diresaun Nasional Saúde Públiku, Departamentu Vijilansia Epidemolojia relata, iha fulan-Janeiru nia laran hahú iha loron 1 too 31, kazu dengue sa’e ba 1.286, husi númeru nee na’in 20 lakon ona vida.