"Ita nia asaun no antisipasaun sira ba situasaun dengue ne'ebé dadaun ne'e kontinua la'o ho esforsu halo asaun prevensaun hodi hala'o fumigasaun atu bele kombate moras dengue iha Timor-Leste," dehan Ministra Saúde, Odete Maria Freitas Belo, iha Parlamentu Nasional, segunda nee (31/01).
Nia hatutan, asaun prevensaun importante seluk mak halo promosaun saúde kona ba ema ida-idak oinsá halo ninia prevensaun iha ida-idak nia uma, halo kampaña hodi fahe informasaun no reativa atividade ekipa task force atu hala’o servisu ativu no promove partisipasaun autoridade lokál no komunidade halo limpeza jerál iha ida-idak nia bairu.
"Ita sei haforsa halo promosaun saúde no halo sensibilizasaun hodi reforsa kondisaun infrastrutura no kontinua halo hodi bele kombate dengue", tenik nia.
Enkuantu, Ministériu Saúde (MS) liu husi Dirasaun Jerál Prestasaun Saúde kontinua hala’o fumugisaun iha área sira ne’ebé risku no rejista kazu dengue sa’e maka'as.
Ho nunee, Ministeriu Saúde mós sei halo koperasaun servisu hamutuk ho Ministériu Administrasaun Estatál (MAE), Ministériu Obra Públika (MOP), Autoridade Lokal no komunidade sira hodi halo limpeza ba baleta sira.
Aleinde, Governu iha planu kontijénsia seluk mak, prepara fatin izolamentu Tasi-Tolu sei sai hanesan departamentu emerjénsia atu atende pasiente dengue bainhira númeru kazu dengue aumenta ba bebeik
Entretantu, tuir dadus husi Ministeriu Saúde liu-husi Diresaun Nasional Saúde Públiku, Departamentu Vijilansia Epidemolojia relata, hahú iha loron 1 to’o 30 Janeiru tinan ne'e, kazu dengue sa’e ba 1.198, husi numeru ne'e na’in 20 mak lakon ona vida.
Asistente Editor: Saturnina da Costa
