Reitór UNPAZ, Adolmando Amaral hateten, Subsidiu bá propinas semester impar nian iha faze dahuluk ezekuta ona no relatóriu submete ona bá iha MESSK.
“Governu aloka ona Orsamentu mai iha UNPAZ hamutuk millaun $1.1 bá faze dahuluk nian. Ho Ida-ne’e ita ezekuta hotu ona, maibé governu fó tan oportunidade mai ita hodi kontinua ho faze daruak nian,” nia hateten iha UNPAZ, Sábadu (29/01).
Bá faze daruak nian, iha ona konta Universidade nian maibé UNPAZ seidauk hetan despaixu husi Ministériu hodi ezekuta, ho Ida ne’e bainhira despaixu to’o sei ezekuta bá estudante sira ne’ebé naran tama ona iha Ministériu.
Lista estudante ne’ebé mak Universidade hatama bá iha Governu hamutuk 9.176, ho ida-ne’e nia Orsamentu hamutuk millaun $1.1.
Faze daruak nian mós nafatin hetan millaun $1.1 husi governu bazeia bá lista estudante ne’ebé sira hatama hanesan iha faze dahuluk nian.
Antes ne’e, Prezidente komissaun Monitorizasaun no Fiskalizasaun bá Implementasaun Higino Alves hateten, Instituisaun 18 ne’ebé mak MESSK atribui ona Orsamentu millaun $5 bá propinas semester par nian mak hanesan UNPAZ, IOB, ICS, ICR, UNITAL, UNDIL, UCT, ISC, DIT, ISFAT, IPB, UNTL no seluk tan.
Semester impar bá estudante sira ne’ebé mak durante ne’e bazeia bá proposta husi instituisaun 18 ne’e hamutuk 64.585, husi númeru ne’e nia Ezekusaun bá estudante sira hamutuk 46.667 ho Orsamentu hamutuk millaun $4.
Semester par nian uluk estudante hamutuk 64.585 no agora tinan Ida-ne’e bá semester par nian hamutuk 66.106 ho orsamentu $5,428.394.
