Doasaun ba fornesimentu no ekipamentu protesaun pesoál husi Forsa Aérea Pasífiku Estadus Unidus nian (PACAF) sei apoia esforsu Timor-Leste nian hodi luta hasoru COVID-19, ho valor orsamentu hamutuk U$20,000, ekipamentu sira ne'e inklui ekipamentu sirúrjiku, sapatu botas no ekipamentu médiku esensiál sira seluk nu’udar parte ida husi kontribuisaun ida uluk husi PACAF iha fulan-Outubru tinan 2021.

“Estadus Unidus Amérika hamriik ho Timor-Leste hanesan belun no parseiru rohan laek ida tanba ita servisu hamutuk hodi kombate Covid-19,” hateten Tom Daley, liu husi komunikadu neebé Online INDEPENDENTE asesu, tersa nee (01/02).

Enkaregadu nee hatutan, Estadus Unidus foti hela abordajen abranjente ida hodi hapara pandemia ne'e, hodi hamenus risku C0vid-19 ba povu no sosiedade sira, hametin rekuperasaun globál no pronto atu hasoru ameasa pandemia ne'e iha futuru. Ho nunee, sira intensifika apoiu ba Timor-Leste atu salva ema nia vida tanba ida ne'e duni mak buat ne'ebé loos atu halo.

Entretantu, Estadus Unidus Amérika servisu hamutuk ho Governu Timor-Leste hahú husi kedas inisiu pandemia ne'e, hodi fornese vasina Pfizer doze 100,620 no millaun $5.9 iha asisténsia krítiku hodi kombate COVID-19. Ida nee inklui ona fundu millaun $2.3 husi Komandu Indo-Pasífiku Estadus Unidus no Ajensia Estadus Unidus ba Dezenvolvimentu Internasionál (USAID) neebé’atu harii fasilidade izolamentu iha Baukau, harii unidade kuidadu móvel iha Dili, no hasa'e kapasidade bee no saneamentu iha sentru kuarentena iha Batugade.

Esforsu ida ne'e, harii ho valór liu millaun $250 ne'ebé USAID kontribui ona hodi apoia dezenvolvimentu inkluzivu no pasifiku iha Timor-Leste dezde 2002.

Asistente Editor: Saturnina da Costa