Prezidente Parlamentu Nasional, Maria Fernanda Lay hateten, komisaun espesializada sira atu halo fiskalizasaun tenke halo indentifikasaun problema.
“Tenke halo fiskalizasaun ida ke di’ak, ha'u rona ona ohin husi asesór iha asuntu lubuk
ida ke ha'u hatun ona ba komisaun, konserteza depois estabelese sira tenke haree lai materia saida mak hato’o ba sira no akonsellamentu ho asesór sira saida mak sira tenke halo,” dehan nia, iha Parlamentu Nasionál, horisehik.
Fernanda dehan, Parlamentu Nasional fiar katak governu iha Institutu Jestaun Ekipamentu (IGE) no Ministru Obras publikas haruka halo servisu hodi halo normalizasaun cheias, ribeira sira ne’ebé sobu uma.
“Klaru katak dezafiu boot ne’ebé hau sempre bolu atensaun iha plenária ita lalika han malu mãos obras apartir ita tomada pose iha ona servisu iha ita-nia oin, agora organiza atu la’o,” tenik nia.
Nia hatutan, fiskalizasaun depois bainhira
governu hala’o tiha, depois Parlamentu nasionál ba cek halo duni ka la’e, populasaun presiza saida atu hodi bele protesaun.
“Klaru hau apela no ita mós iha sekretáriu Estadu ba dezastre naturais ne’ebé estabelese ona sira nia orgaun iha munisipius, osan iha ka laiha, ita haree hodi bele iha situasaun ne’ebé dezesperadu balun uma bee lori, ida ne’e ita labele hein, hau fiar katak governu tuun ba haree, depois Komisaun espesializada toma konta asuntu verifika depois,” nia informa.
Nia subliña, Governu mak tenke tuun ba atu fó apoiu, kecuali Parlamentu Nasional mos tuun ba salva lisuk povu, maibé iha kazu emerjensia Parlamentu ho governu sei servisu hamutuk.
“Tanba ami tenke haree orsamentu iha ka la’e, retifikativu ne’ebé mai ne’e tau mos osan atu dezastre naturais, tanba ita halo ona iha 4 abril 2021 no ita apela atu hot-hotu bele apoia, tanba orgaun sira ne’e estabelese hotu ona, agora funsiona ka la’e, depende ba governu tenke organiza,” nia afirma.
Nia fundamenta, hanoin kazu dezastre naturais la haree se deit, deputadu tenke tuun, tuun, maibé ba halo saida, ba halo konfuzaun deit diak liu haree saida mak tenke halo atu apela ba governu hala’o nia papel di’ak liutan.
