PN husu Governu Apoiu Vitima Insendiu Merkadu Manleuna Featured

By Agustino Santos Gama Fevereiru 16, 2022 288
Insendiu iha merkadu manleuna neebe akontese iha loron 14 fevereiru 2022, oras 06:30. Foto:INDEPENDENTE. Insendiu iha merkadu manleuna neebe akontese iha loron 14 fevereiru 2022, oras 06:30. Foto:INDEPENDENTE.

DILI: Parlamentu Nasional (PN) husu ba Governu liu husi Ministeriu relevante, atu apoiu vitima insendiu merkadu manleuana ne'ebé akontese iha loron 14 fevereiru, iha Suku Manleuana, Postu Administrativu Dom Aleixo.

 “Ita hein katak, governu agora ho orsamentu ne'ebe foin dadaun parlamentu aprova ne'e, bele organiza no halo alokasaun osamentu ne'e ba ministeriu relevante sira hodi bele fo apoia ba Vitima refere," dehan Deputada husi Partidu Frente Mudansa (FM), Isabel Freitas iha Parlamentu Nasional, tersa horseik (15/02).

Nia hatutan, akontesimentu insendiu iha merkadu refere, vitima maioria mesak vendedor kiik no sira nia sasan neebé faan laiha ida mak salva tanba ahi han mutuk hotu.

Tanba ne'e nia dehan, hanesan reprezentante povo iha uma fukum Parlamentu Nasional atu fó hanoin no husu ba governu atu aloka osamentu hodi fó ajuda ba vendedor sira, atu bele rekupera ka hamriik fali sira nia ekonomia, tanba sira infrenta hela insendiu.

Nia esplika, iha akontesimentu ne'e husi parte SEPS la fó apoiu emerjensia, tanba parte SEPS  husu ba Ministeriu Turismu  Komersiu  no Industria (MTCI) atu apoiu emerjensia ruma ba vendedor sira hodi bele hala'o fali-fali sira nia negosiu.

Iha fatin hanesan, Deputadu husi Bankada PD, Adriano do Nasçimento husu mós ba governu atu hare no tau atensaun ba akontesimentu insendiu iha merkadu manleuana.

"se bele governu persija apoiu ita nia vendedor sira, tanba iha akontesimentu ne'e rezulta vendedor sira lakon fatin no sasan hanesan, obrolan, sepatu, pasta no seluk tan, atu nune'e vendedor sira bele halo fali negosiu," dehan nia.

Iha sorin seluk, Koordenador Jestaun Merkadu Manleuana, Julio Barros Fernandes, hateten, kauza husi insediu nee, deskonfia mai husi sirkuit eletrisidade, hodi hamosu insendiu refere.

Nia hatutan, insediu neebé akontese nee, iha parte blok A, fatin neebé estadu prepara ba vendedor sira hamutuk na’in 35 nee no mós uma adisional ka salon ida.

Enkuantu, Sekretariu Estadu Protesaun Sivil (SEPS), Joaquim José Gusmão dos Reis Martins, hateten, insendiu neebé akontese iha merkadu Manleuana nian, parte SEPS sei la fó apoiu emerjensia ruma ba vendedor sira, tanba fatin refere, laos uma neebé hela.

Entrentantu, total vitima ba insendiu iha merkadu manleuana hamutuk na'in 35.

 

Asistente Editor: Saturnina da Costa

Rate this item
(0 votes)

Independente Digital TV