Prezidente Parlamentu Nasional (PN) Interinu, Terezinha Viegas hateten, karta nomeisaun kandidatura ba iha Membru KI nian iha lejizlatura anterior liubá, Parlamentu eleje ona membru ida mak Expedito Dias Ximenes, maibe nia agora asume hela pasta Sekretáriu Estadu Komunikasaun Sosiál (SEKomS), ho nune'e iha fulan-Agostu, loke fali submisaun kandidatura ba membru KI nian.
Maibé, nia hatete, liga ho nomeasaun ba membru Konsellu Imprensa ne'e, meza simu karta submisaun kandidatu ida de'it, ne'ebe submete husi Bankada CNRT ho naran Isabel Maria Fernandes de Jesus.
"Ho nune'e sé permite ita prosede ba eleisaun ba membru refere no mos ho nia buletin votu maka ha'u aprezenta hela ne'e," dehan nia, iha plenária Parlamentu Nasionál, horisehik.
Nia hatutan, , eleisaun ba kandidatura husi Bankada CNRT nian, ho rezultadu votu afavor 39, kontra 0 no abstensaun 6, enkuantu deputadu hamutuk na'in-20 mak aujente (la marka prezensa).
Molok hala'o eleisaun, Prezidente PN Interina mos autoriza sekretaria meza hodi lalo leitura ba deklarasaun aseitasaun husi kandidatura Isabel Maria Fernandes de Jesus, iha plenaria laran.
"Ha'u Isabel Maria Fernandes de Jesus, deklara aseita ho nomeiasaun husi Parlamentu Nasional hodi sai membru ba Konsellu Imprensa, kompremitidu atu hala'o knar tuir konstituisaun RDTL haruka,"deklara liuhusi karta ne'ebe aprezenta husi kandidatura Isabel.
