Iha debate faze espesialidade ba orsamentu Parlamentu Nasionál nian, deputadu na’in tolu husi bankada CNRT no Khunto hato’o proposta atu hasai subsidiu ba deputadu sira.

Proposta ne’ebé propoin husi deputadu CNRT, Gabriel de Jesus Soares ho Fernanda Lay, no deputada Khunto, Irene Gonzaga ne’e, husu atu hasai orsamentu ho montante $1.248.000 ne’ebé prevee ba subsdiu ba deputadu sira.

Iha sira-nia proposta, husu atu realoka orsamentu refere ba atividade garantia funsionamentu serbisu sekretariadu PN atu halo akizasaun ekipamentu infra-estrutura no ekipamentu serbisu teknolojia hanesan ekipamentu sonoro no seluk tan.

Liu husi votasaun, proposta ne’e konsege pasa ho votus a favor 54, kontra lima no abstensaun lima.

“Proposta hasai subsídiu Deputadu ho hanoin hasai hanesan hotu transporte hola viatura ba deputadu sira, tanba ami lakohi, no ami hasai hotu ne’e la’ós subar hotu iha ami-nia karteira, maibé hasai katak alokasaun ba fali sosa sistema sonora, hadi’a viatura ne’ebé tékniku sira uza, la’ós aloka fali ba ministériu seluk,” deklara Gabriel iha sala plenaria PN, Kinta (14/12).

Iha fatin hanesan, Prezidente Parlamentu Nasionál, Maria Fernanda Lay hatete, iha momentu aprovasaun estatutu Deputadu iha faze jeneralidade nia rasik vota kontra subsidiu ba deputadu sira.

"Ba oin sei hadi’a mekanizmu no bainhira karreta aat sei toma mós responsabilidade husi Deputadu sira nune’e motorista Deputadu sira nian bele kuidadu fasilidade estadu nian," nia dehan.

Deputadu bankada KHUNTO, António Verdial de Sousa hatete, tanba hasai tiha subsídiu ba deputadu sira, presiza sosa fali karreta operasionál sekretáriu parlamentár nian hodi apoia Deputadu sira.

Deputadu Fretilin, Antoninho Bianco preokupa tanba ema la kestiona karreta iha Governu ne’ebé barak liu.

“Hanesan membru Governu sira akompaña seguransa pesoál barak liu. Sosiedade sívil tenke loke matan, no Fretilin dehan atu la’o ain mós di’ak tanba ne’e proposta ne’e di’ak nune’e ba oin hein Governu bele halo tuir,” dehan nia.