Estadu Emerjensia ba dala-XI ne’e, sei hahú iha loron 4 fulan-Marsu, oras 00:00 too 2 fulan-Abril, oras 23:59, tinan 2021.
Ho aprovasaun ne’e, Xefe Estadu sei deklara estensaun Estadu Emerjénsia fulan ida tan, atu fó kbiit ba Governu liu husi Sala Situasaun atu halo prevensaun no mitigasaun kona-ba propagasaun surtu COVID-19 nian, liuliu ba zona fronteriza hanesan Bobonaro, Covalima no Oekusi, ne’ebé iha hela risku provavel ba tranzmisaun lokál.
Primeiru-Ministru, Taur Matan Ruak iha mensajen ikus, hodi Governu nia naran solidariza populasaun sira iha liña fronteriza hanesan Bobonaro, Covalima no Rejiaun Administrativa Espesiál Oekusi-Ambeno (RAEAO), no husu atu sakrifísiu uitoan hodi evita iha kazu mate tanba COVID-19.
“Governu solidariza tomak ba sakrifísiu tomak ne’ebé populasaun sira iha fonteira daudaun ne’e pasa, ita la iha dalan seluk. (…) Husu ba inan-aman sira hotu iha ne’ebé de’it, liuliu sira ne’ebé iha liña fronteira no iha ligasaun ho viziñu sorin balun, paraké halo sakrifísiu dala ida tan hodi ita hotu evita ita-nia ema sira mate tanba moras COVID”, dehan Xefe Governu.
Enkuantu Xefe Governu kompromete ba membru Parlamentu sira katak, Governu sei kontinua esforsu tuir posibilidade ne’ebé iha atu evita sidadaun sira labele mate tanba COVID-19 nune’e mós tanba hamlaha, no mos husu atu pasiénsia uitoan hodi hein prosesu vasinasaun ne’ebé iha hela prosesu laran, ne’ebé la kleur tan sei implementa.
Ikus liu, Xefe Governu agradese ba komprensaun no apoiu Parlamentu Nasionál nian durante ne’e iha luta kontra COVID-19.
Tuir dadus hosi Komisaun Nasionál COVID-19, loron 1 fulan-marsu, daudaun ne’e Timor-Leste iha kazu pozitivu KOVID-19 ativu 23, hosi total kazu kumulativu hamutuk 113, dezde pandemia ne’e deteta dahuluk iha fulan Marsu tinan 2020, enkuantu seidauk rezista kazu óbitu. Entretantu iha nivel mundial nian, tuir dadus hosi https://www.worldometers.info/coronavirus), loron 1 fulan-marsu tinan 2021, kazu pozitivu atinje ona millaun 114,721,904, mate millaun 2,533,018 no ne’ebé rekuperadu millaun 90,280,232.
