Apoiu umanitariu ne’e liu husi Ministeriu Solidaridade Sosial no Inkluzaun (MSSI) no Ministeriu Kordenador assuntu Ekonomiku (MAKE). Distribuisaun fós hamutuk saka 400, husi sentru logistika nasionál (CLN-sigla Portuges).

“Deputadu sira nia prekupasaun ne’e klaru tanba ne’e horsehik ekipa Ministeriu Solidaridade Sosial no Inkluzaun (MSSI) ajuda ona umantaría sosial hanesan foos no nesesidade seluk ba ona populasaun Fatumea ne’ebé agora dadaun enfrenta transmisaun lokal kona-ba Covid -19, no autoridade lokal sira servisu hamutuk ona ekipa MSSI atu suporta dadus lolos ba ekipa MSSI hodi aseleira distribusaun ai-han ida ne’e,”dehan Fidelis iha plenaria debate estensaun estadu emerjensia bad ala-XI, iha Parlamentu Nasional.

Governante ne’e apela ba populasaun hotu iha Munisipiu Bobonaro no Covalima atu mantein kalma hodi fó fiar ba Governu bele atende lalais prekupasaun populasaun sira iha Munisipiu rua ne’e.

Entretantu Bankada Partido Demokratiku iha Parlamentu Nasional husu urijente ba Governu atu atende lalais aihan ba populasaun iha Munisipio rua hanesan Bobonaro no Covalima tanba sira komesa hamlaha.

Liu husi intervensaun Sekretario Jeral Partido Demokratiku, Antonio da Concecao "Kalohan" hatete, populasaun Munisipiu rua ne'e komesa infrenta hamlaha tanba Governu bandu sira atu hala’o sira nia  atividade servisu negosiu.

“ Governu tenke prepara kondisaun ba populasaun Covalima no Bobonaro se karik Estadu Emerjensia dala-11 ne’e,  hodi kontinua aplika regra rigorozu ida ba populasaun sira iha Fronteira atu prevene Covid -19 labele da’et ba ema seluk, Governu tenke hare sira nia direitu moris tanba sira komesa infrenta ona hamlaha,” dehan Kalohan iha Parlamento Nasional (1/3).

Nia hatutan, Partidu Demokratika aseita atu Ministeriu Saude iha medida Prevensaun ba Covid -19 atu bele hapara transmisaun lokal iha Covalima maibé Governu mós tenke tau matan ba sira nia fundamento moris.

Abitantes Munisipiu Covalima hamutuk rihun 65.301, husi uma kain rihun 12.564. Abitantes Munisipiu Bobonaro hamutuk rihun 97.762 husi uma kain rihun 17.635. Dadus ne’e bazeia ba sensu uma kain 2015.