Tuir Ministru Presidensia Konsellu Ministru, Fidelis Mangalhães Leite hatete, Governu liu husi Konsellu Ministru aprova medida ezekusaun estadu emerjénsia, ne’ebé renova fila fali liu-husi Dekretu Prezidente Repúblika nú. 15/2021, iha loron 1 fulan-marsu, hodi hatán ba pandemia COVID-19.
“Estadu Emerjensia dadaun ne’e renova abranjen teritoriu nasional tomak no vigor hahú husi oras 00.00 iha loron 4 fulan-marsu tinan 2021 no sei kontinua oras 23.59 iha loron 2 fulan-abril tinan 2021,”dehan nia iha Palasiu Governu, hafoin reuniaun Konsellu Ministru, tersa (2/3).
Governante ne’e esplika, medida ne’e laiha mudansa ida bo’ot kompara ho ida ne’ebé agora revijenti hela, liuliu bandu atu ultrapassa fronteira ba fins tradisionál ka kustumeiru nian no atu asesu ba merkadu reguladu.
Obriga katak sirkulasaun internasionál hala’o de’it liu-husi postu fronteira, ne’ebé bele taka tuir desizaun Ministru Interiór (MI) bainhira razaun seguransa ka saúde públika justifika.
Enkuantu, sujeisaun ba ema hotu ne’ebé hakarak tama ka sai husi teritóriu ba kontrolu sanitáriu, nune’e mós impede sirkulasaun internasionál ba ema hotu ne’ebé aprezenta sintoma infesaun SARS-CoV-2 ka COVID-19, impozisaun ba izolamentu prolifilátiku (kuarantena) ba ema hotu bainhira tama iha teritóriu nasionál; sujeisaun ba ema hotu ne’ebé diagnostikada COVID-19 ba izolamentu terapéutiku.
“Iha dekretu ida ne’e mós kontinua ezize atu implementa kuarentena ba ema hirak ne’ebé tama husi liur mai iha ita nia rain, kuarentena obrigatoriu no iha medida ida ne’e dehan katak so ba diplomata sira no sira nia familia mak sira bele iha autokarentena,”nia informa.
Durante vijénsia diploma ne’e, ema hotu ne’ebé hela iha Timor-Leste, tenke mantein distánsia, pelumenus, metru ida ho ema seluk ne’ebé la hela iha ekonomia komun, utiliza máskara oin nian hodi taka inus no ibun bainhira asesu ka tama ba-iha fatin públiku ka privadu ba utilizasaun koletiva, fase liman bainhira hakarak tama ba-iha estabelesimentu komersiál sira, industriál ka prestasaun servisu ka iha edifísiu iha ne’ebé hala’o servisu administrasaun públika.
“Oras ne’e prevé posibilidade atu suspende temporária prosesu ensinu no aprendizajem, iha rejime prezensiál, karik departementu governamentál responsavel ba saúde públika rekomenda ho efeitu atu hamenus risku transmisaun SARS-CoV-2,”nia dehan.
Antes ne’e iha loron 1 fulan-marsu Parlamentu Nasional (PN) aprova ona pedidu husi Prezidente Republika ba estensaun Estadu Emerjensia (EE) ba dala-XI.
Rezultadu votasaun nominal ho votus afavor 53, kontra 0 no abstensaun 12.
Estadu Emerjensia ba dala-XI ne’e, sei hahú iha loron 4 fulan-Marsu, oras 00:00 too 2 fulan-Abril, oras 23:59, tinan 2021.
Ho aprovasaun ne’e, Xefe Estadu mós dekreta ona estensaun Estadu Emerjénsia fulan ida tan, atu fó kbiit ba Governu liu husi Sala Situasaun atu halo prevensaun no mitigasaun kona-ba propagasaun surtu COVID-19 nian, liuliu ba zona fronteriza hanesan Bobonaro, Covalima no Oekusi, ne’ebé iha hela risku provavel ba tranzmisaun lokál.