“Diskusaun interna  hotu mak lori mai Konsellu Ministru aprova hafoin lori fali ba Parlamentu Nasional, sei prosesu hela no ha’u seidauk dehan bainhira mak atu lori mai Konsellu Ministru (KM),”dehan nia iha Palasiu Governu (2/3).

Antes ne’e Diretor Nasional ba Protesaun no Promosaun ba Direitu Ema ho Defisiensia (DNPDPD)-MSSI, Mateus da Silva informa, Prosesu ba ratifikasaun Direitu Ema ho Defisiensia agora dadauk sei iha hela Ministeriu Negosiu Estranjeiru Kooperasaun (MNEK) hodi bolu Ministeriu relevante hotu atu halo tan diskusaun, hafoin deside hodi lori ba Konsellu Ministru (KM).

Prosesu ratifikasaun ne’e agora dadauk MNEK mak fasilita no ajuda atu kordena prosesu ne’e.

Nune’e ba oin MNEK sei iha inkontru ho tan Ministeriu Relevante sira hodi husu sira nia pareser favoravel ne’e  no atu esplika kona ba kondisaun no rekursus hotu ne’ebé eziste iha ministeriu sira iha Timor-Leste no pronto ona atu ratifika konvensaun ne’e.

“ Ida ne’e sai hanesan referensia ida atu ba oin halo inkontru ho nasaun sira iha ASEAN, sai mós hanesan referensia banhira atu halo diskusaun karik husi parte ita nian bele konvense fasilita ita tama iha membru ASEAN,”nia informa.

Nia akresenta, MSSI mak fasilita atu koordena asuntu ida ne’e no MNEK mak lidera hodi halo diskusaun ba konvensaun ne’e.

Molok ne’e Asosiasaun Defisiensia Timor-Leste (ADTL), ezize ba governu atu ratifika konvensaun direitu ba Ema ho Defisiensia.   

Tuir Diretor ADTL, Cesario da Silva hatete, Timor-leste presiza ratifika konvensaun direitu ema ho defisiensia tanba CRPD mai husi tratadu internasional ida ne’ebe estebelese kona-ba saida mak tenki halo ho estudu atu garante katak, ema ho defisiensia bele goza sira nia moris hanesan ho ema seluk.

Nia esplika, Baze atu promove, proteze no garante prazer kompletu no igual husi direitus umanus hotu no Liberdade fundamental husi ema hotu ho defisiensia.