Nia hatutan, atividade sira ne’ebé presiza atu suspende mak iha Munisipiu Covalima deit no sei kontinua nafatin serka sanitaria.
Mantein bandu deslokasaun entre munisipiu seluk ba munisipiu Covalima, hahu oras 00:00 loron 4 fulan marsu to’o oras 23: 59 loron 2 fulan Abril tinan 2021.
Nune’e Ministeriu Interior bele mós autoriza deslokasaun ema no sasan ba merkadoria ho fundamentu razaun umanitaria sira no halo protesaun saude públika, seguransa públika ka interese públiku no mós define kondisaun saida mak realiza.
“Konsellu ministru mós renova rezolusaun governu nian ida ne’ebé mak hatuur serka sanitaria ba munisipiu kovalima sei kontinua bainhira medidas Estadu Emerjensia foun remata iha 02 Abril 2021, maibé depende se bainhira komunidade iha Kovalima koopera ho di’ak konsellu ministru bele halo lalais fali rezolusaun ida sei halo kotu serka sanitaria ne’ebé mak vijente hela,”nia informa.
Kona-ba medidas prevensaun, mantein medida ida ne’ebé antes ne’e aprova ona, laiha mudansa ida ne’ebé bo’ot kompara ho ida ne’ebé agora revijenti hela, liuliu bandu atu ultrapassa fronteira ba fins tradisionál ka kustumeiru nian no atu asesu ba merkadu reguladu, obriga katak sirkulasaun internasionál hala’o deit liu-husi postu fronteira, ne’ebé bele taka tuir desizaun Ministru Interiór (MI) bainhira razaun seguransa ka saúde públika justifika.
Enkuantu, sujeisaun ba ema hotu ne’ebé hakarak tama ka sai husi teritóriu ba kontrolu sanitáriu, nune’e mós impede sirkulasaun internasionál ba ema hotu ne’ebé aprezenta sintoma infesaun SARS-CoV-2 ka COVID-19, impozisaun ba izolamentu prolifilátiku (kuarantena) ba ema hotu bainhira tama iha teritóriu nasionál; sujeisaun ba ema hotu ne’ebé diagnostikada COVID-19 ba izolamentu terapéutiku.
Prezidente Repúblika, Francisco Guterres Lú Olo, iha 1 marsu 2021, dekreta ona estadu emerjénsia dasanuluk-resin-ida ne'e.
Prezidente Repúblika dekreta Estadu Emerjénsia hafoin pedidu estensaun aprova iha Parlamentu Nasionál ho votus-a favor 53 no 12 abstensoins. Molok ne’e, iha 24 fevereiru, Prezidente Repúblika rona uluk Konsellu Superior Defeza no Seguransa no Konsellu Estadu.
Dekretu hosi Prezidente Repúblika, hanesan mós sira seluk, hasai parsialmente to’o agora, hodi deklara estadu emerjénsia, fó kbiit ba Governu bele foti medidas hodi suspende direitu konstitusional balun sidadaun sira-nian, inklui ba sirkulasaun internasional, sirkulasaun iha rai-laran, direitu ba reuniaun no manifestasaun no seluk tan. Kona-ba direitu edukasaun, purezemplu, entidade responsável ba saúde públika bele foti medida suspensaun temporária ba prosesu atividade ensinu ho rejime prezensiál hodi hamenus risku kontájiu iha eskola sira