Primeiru Ministru Kay Rala Xanana Gusmão liu husi nia diskurs hatete, Universidade Katólika Timorense (UCT), São João Paulo II sai refensia no peskiza iha rai-laran, tanba la’ós de’it fó edukasaun ho kualidade ba foin-sa’e sira, maibé iha mós dezenvolvimentu intelektuál no espirituál, bazeia ba prinsípiu morál, étiku no relijiozu kristaun ne’ebé forte.
“Tanba ne'e, hanesan priviléjiu adisionál ida atu selebra mós ohin, iha kompañia hosi ekipa jestaun no pesoál profesór sira ne'ebé maka vigorozu no komprometidu, akreditasaun institusionál hosi nivel exelénsia Universidade ida-ne'e nian, hosi Ajénsia Nasionál ba Avaliasaun no Akreditasaun Akadémika (ANAAA),” dehan PM Xanana, Hafoin inaugura edifisiu foun Papa Francisco iha Universidade Katolika Timorense (UCT), São João Paulo II Balide, Kuarta (19/03).
Xefe governu mós hato’o, Parabéns bá atinjimentu sira hotu no hein katak sei kontinua serbisu hodi fornese formasaun akadémika ho kualidade bá foin-sa’e Timor-oan sira.
Esensiál katak Timor-Leste nia rekursus umanus iha ferramenta sira ne’ebé adekuadu ba iha realidade, hodi bele kontribui ba nasaun nia dezenvolvimentu, mós ho forma kompetitiva ho instituisaun universitáriu sira seluk, inklui internasionál sira.
Líder nasionál sira ne’ebé Timor-Leste presiza, atu konsolida ninia independénsia no dezenvolvimentu sustentável, mak sira ne’ebé komprende sira-nia responsabilidade, tanba sira hetan ona asesu barak liu ba koñesimentu, siénsia, teknolojia no dezenvolvimentu ba sira-nia abilidade krítika, pesoál no interpesoál.
“Ha’u hein katak sira asume sira-nia misaun fundamentál iha sosiedade timoroan, hanesan sira-nia inan-aman no avó sira asume sira-nia misaun, iha tinan 50 ikus ne’e, atu liberta no dezenvolve pátria, hodi tau nesesidade koletiva sira aas liu kualkér nesesidade individuál. Líder loloos la lidera povu, pelu kontrariu povu mak lidera. No koletivu ida ne’e mak tenke rona no respeita atu Timor-Leste bele la’o ba oin,” katak PM Xanana.
Xanana Lembra fali katak, Santu Amu-Papa nia hanorin sira, ne’ebé edifísiu ne’e hanaran tuir nia, hodi repete katak esensiál atu reabilita saida mak sentidu servisu nian no saida mak sentidu bem-komún nian.
Tan ne’e, Xefe Governu enkoraja ema hotu atu muda husi mentalidade submisaun nian ba moris-di’ak superfisiál, ba mentalidade dignu ba identidade timoroan nian, luta nafatin ba ema hotu nia liberdade, dignidade no moris-di’ak, ho fiar iha Maromak no prontu atu serbí Pátria. No dezeja susesu ba profesór no estudante sira iha UCT, atu nune’e sira kontinua fó razaun orgullu nasionál ba Timor-Leste.
