Koordenadór Gabinete Apoia Soseliedade Sivil (GASS), Joaquim da Costa Freitas hatete, projetu konstrusaun igreja Ai-Mutin hahú iha tinan 2015 no prosesu konstrusaun ne’e atinji ona kuaze 91%.
"Relasiona ho igreja Ai-Mutin, Gabinete Apoiu Sosiedade Sivil hamutuk ho CET ho mós Dioseze Dili, ami kontinua hela iha koordenasaun para atu buka solusaun na igreja Ai-Mutin, tanba hahú inísiu ema ne'ebé responsavel ba projetu ne'e mak ha'u rasik, tan ne’e buka hela atu rezolve ida ne'e," dehan Koordenadór iha Palásiu Governu, Kuarta (19/03).
Koordenadór dehan, igreja Ai-Mutin ho nia alokasaun orsamentu iha BOQ $4.8, maibé governu halo komitmentu tau millaun $3.
Husi milaun $3 ne’e mak dadauk ne’e ninia prosesu kontrusaun besik 91% no seidauk bele finaliza.
"Entaun atu aumenta tan montante balun par halo hotu, ka entrega ba Dioseze mak Dioseze halo hotu. Ne'e, ami iha hela diskusaun atu bele hatene difikuldade sira ne'e akontese iha ne'ebé, dezafiu saida mak halo nian seidauk hotu," dehan Koordenadór.
Nia esplika, ho prinsípiu informasaun sira ne'ebé mak iha GASS, Gabinete Vise-Primeiru-Ministru, Sosiedade Sivil intende no Dioseze mós hatene nia dezafiu ne'e iha ne'ebé.
“Maibé ema ida-idak ne'ebé mak envolve iha konstrusaun igreja Ai-Mutin, tenki asume nia responsabilidade, tan ne’e ema ne'ebé asume responsabilidade dadaun ne’e hamutuk hodi konsentra informasaun hotu no iha esperansa katak obra ne’e sei kontinua,”tenik nia.
Entretantu, Koordenadór GASS afirma, kada tinan simu relatoriu konaba igreja aimutin nian hahú husi tinan 2016 to'o agora.
“Rezultadu husi ADN dadaun ne’e iha ona GASS nia meza, no sira mós informa ona Vise-Primeiru-Ministru no Dioseze mós hatene projetu ne’e nia lala'ok to’o iha ne'ebé. No agora kompetensia Vise-Primeiru-Ministru nia oinsa atu organiza parte sira ne'ebé envolve iha konstrusaun atu tur hamtuk hodi hare nia efisiensia nee iha ne'ebé,”GASS akresenta.
Enkuantu, tuir rezultadu estudu, projetu igreja Ai-Mutin nia atinjimentu foin tama 91, % no sei falta 8,% husi ezekusaun millaun $3 ne’e.
