Nia dehan, vizita Papa Francisco nia mós buat ida ne'ebé importante tebetebes, sorti loron tolu de'it, ne'ebé iha Konsellu Ministru haree ona saida tan mak sei halo mas fasil tanba iha loron segundu depois misa, loron terseiru Papa fila.
"Ita husu boot de'it mak sarani sira mai ho respeitu tanba nia hanesan Xefe boot Igreja Katólika nian iha mundu no idade mós avansadu ona," dehan PM Xanana, iha Palasiu Prezidensiál, Bairru-Pité, horisehik.
Entretantu, oráriu iha loron 9 Setembru 2024 Papa Francisco ho nia delegasaun sei to'o iha Aeroportu Internasionál Nicolau Lobato. Hafoin delegasaun ne'e direitamente ba rezidensia Nunsiu Apostóliku Motael hodi deskansa.
Tuir oráriu iha lokraik Papa Francisco sei hasoru Prezidente Repúblika José Ramos Horta iha Palasiu Prezidensiál Bairu-Pite no prezente mós iha sorumutu ne'e reprezentante husi líder sira relijiaun Katóliku, Protestante, Muslmanu, Hinduizmu.
Iha loron 10 fulan Setembru Papa Francisco sei halo vizita ba orfonatu Madre Alma iha Pantai Kelapa hodi hasoru malu ho labarik ho labarik sira difisiensia.
Tuir mai Papa Francisco ho delegasaun kontinua ba katedral Dili hodi hasoru malu ho líder sira iha Igreja Katólika TImor Leste nian, Padre sira, Madre sira husi kongregasaun oioin iha Timor Leste. No iha lokraik oras tuku 04 sei iha missa hamutuk iha tasi tolu ne'ebé sei prezide direita husi Papa Francisco no tuir ajenda missa ne'e sei la'o durante oras ida de'it.
Iha loron 11 Papa Francisco sei hasoru malu ho foinsáe sira hamutuk rihun 3. Hafoin ida ne'e Papa Francisco husik hela rai Timor no kontinua vizita ba nasaun Singapura.
