Primeiru Ministru husu ne’e, bainhira partisipa iha diseminasaun Dekretu Lei númeru 38/2024, kona ba regulamentu auditória interna no mós aprezentasaun Dekretu-Lei númeru 43/2024 kona ba ezekusaun Orsamentu Jerál Estadu (OJE), tinan 2025, ne’ebé organiza husi Ministériu Finansas, liu husi Unidade Inspesaun Jerál, iha salaun Ministeriu Finansas, Aitarak-laran, Dili, Segunda (17/03/2025).
“Dekretu Lei sira ne’e husu ba ita hotu, kada instituisaun Estadu atu aplika didi’ak norma sira ne’ebé orienta ita ba iha buat ne’ebé ita temi Osan povu nian jere ho di’ak,” PM Xanana hatete liu husi komunikadu ne’ebé online INDEPENDENTE asesu iha Pájina ofisiál Primeiru-Ministru Kay Rala Xanana Gusmão, Segunda (17/03).
Xefe Governu, temi ida ne’e, tanba vizita ona rai barak ne’ebé riku no bo’ot liu Timor-Leste maibé osan laiha.
Tanba ne’e, Xanana Gusmão dehan Timor-Leste sorte bo’ot liu tan tanba hanesan nasaun kiik maibé iha ninia osan mai husi Fundu Petróleu ne’ebé menus beibeik ona.
“Ida-ne’e mak hakarak ko’alia ba ita bo’ot sira ne’ebé sei halo auditoria interna ne’e, labele husik liu ‘duit ’ida. Kuandu imi halo hanesan ne’e, povu no rai ida ne’e sei iha garantia katak ita sei dezenvolve ita nia rain,” PM Xanana enkoraza.
Entretantu, Primeiru Ministru Xanana husu partisipante sira atu aproveita tempu ho didi’ak, bainhira la komprende tenke husu esplikasaun, nune’e bele implementa didi’ak norma sira ne’e ba defende interese Estadu.
